Boer Tickey vra die ja-woord

Kort ná die klok se lui het hy met sy bakkie buite die skool geparkeer, vir die tiende keer op dié Maandag-oggend reukweerder aangespuit en in die truspieëltjie gekyk of sy blonde kuif netjies lê. Die senuwees van die boer met die breë skouers en sonbruin vel was gaar. Hy’t die vorige nag niks geslaap nie, en die boksie met die verloofring het soos ’n klip in sy sak gelê.

Tickey van Wyk (34) het die knop in sy keel probeer afsluk en aanstaltes gemaak na juffrou
Selme-Louise du Plessis se gr. 3-klas by die Laerskool Nelspruit. Toe hy die fyn donkerkop buite haar klas sien staan met haar rug na hom gekeer, het hy nader gedraf, haar ’n tikkie op die skouer gegee en geroep: “Môre, juffrou!”

Selme-Louise (28) was so verbaas sy kon skaars iets sê. Sy’t immers die vorige aand nog gehuil oor die lang weke wat voorgelê het voor Tickey weer die 1 300 km tussen sy plaas buite Loxton in die Noord-Kaap en
Nelspruit in Mpumalanga kon aflê om vir haar te kom kuier. En hier stap Tickey die klas binne, groet haar leerders met ’n vrolike “Môre, maats!” – en sak op sy regterknie neer . . .

Hy’t die boksie met die blink ring uit sy sak gegrawe en net daar vir Selmatjie, soos hy haar noem, gevra: “Sal jy met my trou?” “En toe ek ‘Ja!’ sê, het al die graaddrietjies begin hande klap!” vertel ’n stralende Selme-Louise ’n dag later. “Ek en Tickey was albei in trane.”

Tickey is nie die eerste kykNET-boer wat ’n blink diamant aan sy kitsmeisie se vinger steek nie. Hennie van Deventer het Louanda Erasmus sommer op die program die jawoord gevra, maar die verhouding het nie gehou nie. Nadat hy en Louanda uitmekaar is, het hy terstond begin uitgaan met Yolindi du Preez, ’n ander deelnemer aan die werklikheidsreeks.

Maar Tickey en Selme-Louise weet hulle gaan nie dieselfde pad stap nie. Hulle sê albei: “Ons is bedoel vir mekaar.”

Lees in Huisgenoot van 5 Maart meer oor boer Tickey en sy Selme-Louise.

Harry Campbell wys sy kleinding

In die hoek van sy vrolike babakamer staan ’n halfmeter hoë spierwit beer met ligblou ore wat Kurt Darren en sy meisie, Dunay Nortjé, nog voor sy geboorte vroeg in November vir hom gegee het.

Dit is dieselfde oom Kurt wat ook sy naam geïnspireer het, vertel die country-sanger Harry Campbell (33) terwyl hy sy rooikop-seuntjie, Curtis, op die ligbruin hobbelperdjie wieg.

‘‘Ek wou ’n sterk naam hê,’’ sê ma Nadene (26). ‘‘Ek het gedink aan Kurt, maar Harry wou nie; hy het gesê ons seun gaan sy eie mens wees. Toe sien hy die naam Curtis, en ons het albei daarvan gehou.’’

Klein Curtis lê nou stroopsoet en slaap, maar dinge was nie van die eerste dag af maanskyn en rose nie. Nadene het nier-ontsteking gekry omdat Curtis se koppie die buis tussen een van haar niere en haar blaas platgelê het. Om skade aan haar nier te voorkom, is hy vier weke te vroeg met ’n noodkeisersnee in die wêreld gebring.

Daarna het hy ’n maand lank onophoudelik gehuil, en sy radelose ouers is van dokter tot dokter met hom. Eers die vierde een het agtergekom Curtis het al van geboorte af ’n liesbreuk. Hy is dadelik geopereer, en sedertdien kry die klein rooikop en sy ouers aansienlik meer slaap.

Curtis se familie is van albei kante af met rooikoppe besaai. Harry en sy sangmaat-broer, Tony, is albei met rooi hare gebore en Nadene se oupa was ook ’n kerriekop. Sy pa het Curtis sommer dadelik die Rooi Gevaar gedoop.

En ja, hy het nie van die heel eerste oomblik af gedink Curtis is die mooiste baba wat hy al ooit gesien het nie, sê Harry en lag verleë. “Hy was wit van die was en hy was blou. My eerste gedagte was: ‘Wat is dit? Dis ’n wit-blou baba,’ ” vertel hy met ’n breë glimlag.

Maar later, in die waakeenheid, waar Curtis suurstof moes ontvang, het Harry trots elke stukkie van sy seun gemeet en hom met sy selfoonkamera afgeneem. ‘‘En nou kan ek nie ophou om oor hom te praat nie.’’

In Huisgenoot van 5 Maart gesels Harry en Nadene Campbell oor hul eersteling.

Wen!
Vyf gelukkige Huisgenoot-lesers kan elk ’n kopie van Die Campbells se nuwe CD, Keep It Country, wen. SMS net die woord ‘‘Campbells’’ na 34922. Die kompetisie sluit op 12 Maart. Elke SMS kos R2.

Oscar-tapyt vir Soweto-koor

Hulle het hul uitrustings vir die Oscars noukeurig gekies – tradisionele Afrika-styl, met helderkleurige spatsels – maar die instap op daardie lááng rooi tapyt het hulle steeds laat naels kou. Wie sou dan nou ’n klompie Suid-Afrikaners tussen al die glansmense van Hollywood raaksien?

Maar toe die nege lede van die Soweto Gospel Choir versigtig uitstap op die tapyt na die deur van die Kodak-teater in Los Angeles, het die skare hulle luidkeels toegejuig. En dit was maar net die begin . . .

’n Paar treë voor hulle het die superster Will Smith en sy vrou, Jada Pinkett Smith, die beroering gehoor. En daar draai hulle toe in hul voetspore om om hulself te gaan voorstel aan die sangers wat die hele pad van Suid-Afrika gekom het om hul Oscar-benoemde liedjie Down to Earth uit die animasiefliek WALL-E weer op die groot aand te kom uitvoer.

“Ek was bekommerd dat niemand sou weet wie ons is nie en dat hulle nie in ons sou belangstel nie, maar ek was heeltemal verkeerd,” sê Shimmy Jiyane, een van die koor se stigterslede, toe ons hom ná die groot aand opspoor.

“Een van die aanbieders het ons voorgestel en die skare het tekere gegaan. Hulle het ons aanhou toejuig en ons gevra om te sing terwyl honderde fotograwe ons afgeneem het. Ons het toe twee liedjies, Noyana en Seteng Sediba, gesing en die skare was dol daaroor.”

WALL-E, die fliek oor die robot wat die mensdom se rommel moet opruim, het toe die Oscar vir beste animasie-fliek gewen, maar Down to Earth moes die knie buig voor die liedjie Jai Ho uit Slumdog Millionaire. Nie dat dit enigsins hul gees gedemp het nie, sê Shimmy.

“ ’n Oscar sou die kersie op die koek gewees het, maar sjoe, dit was ’n onvergeetlike aand! Ons het die kans gekry om nes al die glansmense op die rooi tapyt te stap en voor die grootste name in Hollywood op te tree.’’

En in helderkleurige kostuums geklee vir hul optrede saam met John Legend, het die groep toe die eerste Suid-Afrikaners geword wat by die Oscars optree.

Lees in Huisgenoot van 5 Maart meer die Soweto Gospel Choir se aand by die Oscars.

Diana se skoonsus skei weer

Sy was eens ’n adellike en hy ’n sukkelende model, maar almal was verheug toe die nuus kom dat Jonathan Aitken en Victoria Spencer, eksvrou van prinses Diana se broer, Charles Spencer, gaan trou.

Vir familie en vriende was dit rede tot groot vreugde dat sy weer liefde gevind het ná ’n onstuimige huwelik en bitter egskeiding van die graaf. En die feit dat Jonathan, nes sy, ’n gerehabiliteerde dwelmslaaf was, kon dinge dalk net makliker maak, het almal gemeen.

Maar nou, vier jaar later, is die twee aan die skei. En toe die nuus einde verlede jaar op die lappe kom, het die Britse skinderkoerante bespiegel dat hy dalk weer voor dwelms geswig het.

Dit is onsin, sê mense na aan hulle albei nou oor hierdie gerugte. Buiten een keer dat Jonathan wel gestruikel het, het dwelms geen rol in hul egskeiding gespeel nie.

“Ek mag nie die presiese persoonlike redes vir die egskeiding bespreek nie,” sê ’n bron na aan die gesin. “Wat ek wel kan sê, is dat daar baie aaklige berigte oor Jonathan was wat geheel en al onwaar is. Albei het probleme wat daartoe bygedra het dat die huwelik misluk het, en ons as die familie kan net hoop dat hulle uit hul foute leer.”

Victoria (43) en Jonathan (40) is in 2005 ná die geboorte van hul seun, Samuel (nou vyf), getroud en het ’n huis in Kaapstad gedeel met haar kinders by Charles: Kitty (18), die tweeling Eliza en Amelia (16) en Louis (14).

Jonathan en Victoria het mekaar ontmoet nadat haar huwelik met Charles reeds in 1996 geëindig het toe sy uitgevind het hy het net ses maande ná die geboorte van hul eerste kind ’n verhouding met ’n joernalis gehad.

“Dis baie tragies en natuurlik word die kinders geraak, veral klein Samuel. Die kinders vaar in die omstandighede goed, maar dit is natuurlik vir hulle ’n emosionele, pynlike tyd,” sê ons bron.

“Toe ek laas met Victoria gepraat het, het sy vir my gesê sy sal Kaapstad nooit verlaat nie, en Jonathan ook nie, want dit is nou sy tuiste.”

Lees in Huisgenoot van 5 Maart meer hieroor.

Oscar-sterre terug na krotbuurt

Hul fliek het pas skoonskip gemaak by die Oscars en hulle het die hele pad van Indië na Amerika gevlieg om die glansgeleentheid in Los Angeles by te woon – en vir dié twee kinders kon dit net sowel ’n besoek aan die maan gewees het.

Want noudat die laaste kameraflitse verdoof het, die aandpak en glinsterrok teruggegee is en die Hollywood-beroemdes almal huis toe is, is die twee jong akteurs van die trefferfliek Slumdog Millionaire weer terug in hul nederige huise te midde van uiterste armoede in ’n krotbuurt van Moembaai. Maar dalk ook nie meer vir lank nie.

Azharuddin Ismail (10) en Rubina Ali Qureshi (9) speel die jong Salim en Latika in die fliek wat agt Oscars verower het, onder meer vir rolprent van die jaar en beste regisseur, nadat dit reeds met sewe Baftas en vier Golden Globes bekroon is.

Rolprentmakers het die twee jong akteurs in die krotbuurt waar hulle woon, gaan uitsoek. Ironies genoeg gaan die fliek juis oor ’n seun wat in ’n krotbuurt grootword en wie se hele lewe omgekeer word wanneer hy 20 miljoen rupees (sowat R3 978 000) in ’n TV-vasvraprogram wen.

Die boodskap van Slumdog Millionaire, gebaseer op die boek Q&A deur Vikas Swarup, is dat liefde en deursettingsvermoë alles oorwin. En geeneen van die sterre daarin gryp mense se verbeelding meer aan as Azharuddin en Rubina nie.

In Indië is hulle net nog twee van miljoene krotbuurtbewoners van Bandra in Moembaai, waar hulle buite in vuil water moet was en verflenterde klere dra.

Vir die kinders moes hul besoek aan Amerika iets soos ’n besoek aan ’n ander planeet gewees het. Hulle het ook vir Mickey en Minnie Muis in Disneyland gaan ontmoet, en Universal Studios se rolprent-ateljee gaan verken.

Daarna was dit terug na Bandra vir partytjies ter viering van hul fliek se sukses, en terug na die huis langs die rioolpyp en die gehug onder seil. Maar danksy die fliek lyk dit tog of ’n deur na ’n blinker toekoms op ’n skrefie vir dié twee kinders van die kortbuurt oopgegaan het . . .

Lees in Huisgenoot van 5 Maart meer oor Azharuddin en Rubina.

Dawid, die haan van 7de Laan

Dis wat kom van aldag vry. Moeilikheid. Sommer groot moeilikheid.

Maar Dawid Greeff steur hom klaarblyklik net mooi niks aan die gevaarligte wat neonrooi begin flikker sodra hy vir ’n vrou loer nie. Om die waarheid te sê, dis die lig waarby hy wandel . . .

Dié rokjagter het hom nie eens van stryk laat bring nadat sy flankeerdery met Helena hom in die hospitaal laat beland het nie. Toe hy uit sy koma ontwaak nadat ’n gebroke Helena hom in ’n oomblik van woede geskiet het, het hy eenvoudig weer sy flikkers begin gooi . . . En dié keer in die rigting van Helena se suster, Isabelle!

Dit is nou ten spyte van die feit dat die arme Helena vir haar sondes in die tronk boet, en dat sus Isabelle reeds liefde en geluk by Ryno gevind het. Boonop doen Dawid nie juis moeite om Tiffany, sy Australiese eks, af te skud nie . . .

“Al wat ek deesdae heeldag doen, is vry,” sê Stian Bam, wat Dawid speel, met ’n lag en skud sy kop. “Dan vry Dawid met dié een, dan vry hy met daai een. Wanneer Isabelle skuldig voel oor Ryno en van Dawid wegruk, trek hy haar weer nader en sê: ‘KOM!’ En dan vryyyyy ons weer!”

Dawid besef nie eens Isabelle het hom aanvanklik verlei omdat sy wou hê hy moes boet vir wat met Helena gebeur het nie, sê Stian. Maar hy’t die mat sedertdien onder haar voete uitgeruk en die stomme Isabelle is nou smoorverlief.

“Sy’t geval vir my charm; sy’t by haar suster gehoor hoe oulik ek is!” spot hy Illse Roos, wat Isabelle speel.

“Isabelle wou Dawid net ’n les leer,” sê sy. “Sy wou opstaan vir al die vroue wat hy al seergemaak het. Sy wou hom op haar verlief maak en hom dan los, maar toe raak sy regtig verlief. En nou bewe haar knieë wanneer sy hom sien. Sy’s lief vir Ryno, maar kry die bewerasies wanneer sy by Dawid is. Sy kan haarself nie beheer nie; the passion goes to a place of madness.”

Lees in Huisgenoot van 26 Februarie meer oor Stian Bam en Illse Roos.

Mamma Zanne nou baie kalmer

Hy’s skaars vyf maande oud en hy was al by ’n kunsuitstalling, ’n boekbekendstelling, etlike musiekkonserte en sommer ook twee troues. En natuurlik is hy gek oor wandelinge langs die see.

‘‘Hy doen alles saam met ons,’’ vertel die gewilde operasanger Zanne Stapelberg (31) oor hul eersteling, Alexander.

Sy geboorte het haar kalmer gemaak, sê sy terwyl sy hom aan ’n roos laat proe hier by hul huis in Kaapstad.

‘‘Ouerskap het my vreesloos gemaak. Dis ’n groot verantwoordelikheid, maar ook die bevrydendste ding wat nog met my gebeur het. Deesdae, pleks daarvan om my te bekommer oor of ek die hoë note gaan bereik, fokus ek net daarop om vreugde aan die gehoor te verskaf.’’

‘‘Ek kan Alexander by my laat sit terwyl ek sing – hy is mal oor musiek. Hy beweeg sy lyfie as hy musiek hoor. Toe ek swanger was, het ek by ’n Zoeloe-konsert in Durban opgetree en ek kon sweer hy’t op die maat van die musiek geskop!

‘‘Ek wil hê hy moet ’n onafhanklike denker wees en die wêreld met ope arms aanvat. En as hy wil reis en berge klim, moet hy dit vreesloos doen, want dis wat ons by ons ouers geleer het,’’ sê Zanne.

Haar man, Jomar (33), besit ’n sagteware-maatskappy wat net ’n hanetree van die huis geleë is.

‘‘Dis lekker dat my werk net 900 m van die huis is, sê Jomar. ‘‘Ek kan elke middag gou huis toe kom en ’n uur lank met hom speel.

‘‘Vir my is die beste deel van pa-wees dat elke dag anders is. Hy lyk elke oggend anders, maak nuwe geluide.’’

‘‘Toe ons hoor ek is swanger, het Jomar vir my gesê: ‘Liefie, met my intellek en jou mooi geaardheid gaan ons darem ’n mooi kind hê!’ ’’ sê Zanne.

Hul vriende noem Jomar ’n wandelende ensikopledie omdat hy ’n vraat vir algemene kennis is.

‘‘Ek vra hom toe: ‘Maar as jy ons baba leer van die planete, natuur en biologiese name van elke plant, wat gaan ek hom leer?’

“En hy laat hoor toe ewe: ‘Toe maar, jy sal hom goeie maniere leer!’ ’’

In Huisgenoot van 26 Februarie gesels Zanne Stapelberg en haar man, Jomar, oor die vreugde van hul eersteling.

David Tlale bring styl en glans

Sy klantelys lees soos die Wie’s Wie van Suid-Afrika se glansmense: die Idols-aanbieder Liezel van der Westhuizen, die gewilde sanger Lize Beekman, die gewese Mej. Suid-Afrika Basetsana Kumalo, die huidige een, Tatum Keshwar . . .

David Tlale is so vuurwarm dat jy baie mooi moet smeek om kaartjies vir sy vertonings in die hande te kry. En boonop is hy een van net ’n paar plaaslike ontwerpers wie se werk al by die gesogte Paryse modeweek vertoon is. Vanjaar is hy juis weer na die skoue daar, in Londen en in New York genooi.

Die 34-jarige mode-ontwerper het vier Mej. Wêreld-finaliste vir die kompetisie by die Sandton-konferensiesentrum in Johannesburg uitgedos. Al die finaliste is deur plaaslike ontwerpers uitgevat en dit was ’n groot eer, sê die lang, aantreklike man.

‘‘In party dele van die wêreld dink mense nog aan leeus wanneer hulle aan Afrika dink,’’ sê hy met ’n laggie en hy skud daardie kenmerkende afro. ‘‘Hulle weet nie ons het ontwerpers nie; daarom was dit so wonderlik vir die bedryf.’’

Vir David was 2008 ’n waterskeidingjaar. Hy het ’n Stars of Mzansi- en ’n SA Stylprys vir beste ontwerper gewen en sy ontwerpe in New York en Washington vertoon. Nou maak hy hom reg vir die Londen-modeweek
in September.

‘‘Ons kry hope publisiteit en dit hou ons op ons tone,’’ sê hy in sy ateljee in Parktown-Noord in Johannesburg. ‘‘Ek glo in die mag van ‘ons’. Ek sou nooit alles self kon doen nie. Daar sou nie ’n David Tlale gewees het sonder my span rok- en patroonmakers nie. Ek sal die kluts kwyt raak as ek die materiaal moet knip, konsulteer én monsters kry.’’

Sy kenmerkende styl is tydlose elegansie. ‘‘Bowenal glo ek dit gaan oor skoonheid te alle tye, sonder om te hard te probeer. Vroue wat David Tlale-rokke dra, sal die koppe laat draai.’’

– In die volgende uitgawe van Huisgenoot se nuwe musiektydskrif, Huisgenoot-Tempo, wys ons watter rokke David Tlale en ander bekende ontwerpers spesiaal vir ons gewildste sangers ontwerp het vir SkouspelPlus op 14 Maart by die GrandWest-casino in Kaapstad.

Lees in Huisgenoot van 26 Februarie meer oor die modeontwerper David Tlale se toekomsdrome.

Catriona, die heks van Erfsondes

Sit haar op die skerm en sy gee jou dadelik ’n kramp. As sy nie die patetiese vroutjie van ’n buffel is nie, is sy die ou suurpruim met die dun lippies, of die gewetenlose konkelaar, of die kwaadkat met ’n dwelmprobleem.

Catriona Andrew het inderdaad ’n lang rits nare karakters op haar CV. Daar was die humorlose Jane Edwards in Egoli – ’n rol wat sy sewe jaar vertolk het, die gefolterde Liz in Song vir Katryn, die dwelmverslaafde ontkleedanser Alix in Snitch en natuurlik haar jongste, die sluwe Sam in Erfsondes.

‘‘Almal vra my altyd hoekom ek die bose vrou speel,’’ vertel die gesogte aktrise in ’n eetplek in Kaapstad, waar sy bly. ‘‘Ek dink mense in die bedryf sê vir hulself: ‘Ons soek ’n skurk, ’n bose feeks’ en dan sê hulle: ‘O, Catriona Andrew!’ of ‘Ons het ’n prostituut nodig, iemand wat naby breekpunt is. O, Catriona Andrew!’ ”

“Maar ek geniet dit om die slegte meisie te speel,’’ sê die
34-jarige aktrise met ’n stout glimlag. En belowe dan dadelik: As die kykers haar nou in Erfsondes haat, moet hulle net kyk wat in seisoen twee kom . . .

Die reeks is in Julie 2007 op SABC2 uitgesaai en was so gewild dat mense wat dit misgeloop het, gevra het dat dit herhaal word. Dit loop nou oor enkele dae ten einde, maar dan begin die tweede seisoen net sewe weke later, op 14 April.

Verlede jaar het toe wel vir Catriona iets heel nuuts ingehou – benewens haar werk aan Erfsondes, ook haar heel eerste romantiese hoofrol. Die prent, ’n plaaslike produksie, ’n komedie met die titel Finding Lenny, begin op 3 April draai. Dit gaan oor Lenny, gespeel deur Barry Hilton, wat alles verloor en dan op ’n reis gaan om homself te vind.

‘‘Dit was angswekkend,’’ bely sy. ‘‘Ek was senuweeagtig en het gedink: ‘My genade, hoe gaan ek vriendelik speel?’ Maar dit was toe heel lekker om ’n slag soene uit te deel pleks van dwarsklappe . . .

Lees in Huisgenoot van 26 Februarie meer oor Catriona Andrew.

Liefde in die tuin van Eden

Jay du Plessis van Eden het op Valentynsdag ’n knoets van ’n diamant aan die vrou van sy drome, Mia Greeff, se vinger gesteek.

Hy het met Eden se vertoning by Presley’s in Pretoria eers ’n liedjie gesing wat hy spesiaal vir Mia, ’n eiendomsagent van Pretoria, geskryf het: ‘‘Ek wag my lewe lank vir jou / Ek weet als voel nou gou / Maar dis jare lank se liefde wat ek gebêre het vir jou / Jy’s die liefde in my droom / Ek is baie lief vir jou en al wat nog oorbly, is om jou te vra: Wees my vrou?’’ Jay het daarna op die verhoog gekniel en Mia het oorstelp geantwoord: ‘‘Asseblief!’’

Die paartjie is ewe opgewonde oor hul kleinding wat op pad is. ‘‘Ek was saam met Mia by die dokter en toe ek op die sonar die klein hartjie hoor klop, het dit gevoel
of my eie hart by my keel uitspring,’’ het Jay opgewonde vertel.

Terug op die kassie

Terence Bridgett is beslis ’n besige man. Nie net sal die voormalige 7de Laan-akteur in April in die tweede seisoen van Erfsondes te sien wees nie, hy is ook van 20 Februarie terug by die sepie wat hom destyds bekend gemaak het – Isidingo.

En hy speel weer die vroueslaner Chico, het hy vertel toe ons op die stel ’n draai gemaak het. Hy sien ook uit na tonele saam met sy vriende Robert Whitehead (Barker) en Grethe Fox (Harriet). ‘‘Ek en Robert ken mekaar al jare, maar laas het ons nie teenoor mekaar gespeel nie,’’ sê Terence.

Hoe lank sal hy hierdie keer in Horizon Deep bly? ‘‘Ek het nog nie ’n kontrak gesluit nie, maar ek sal minstens tot 2010 in die sepie wees.’’ Aanhangers moet ook op die uitkyk wees vir Pedro Camara (Carlos van 7de Laan) as die tronkbewaarder Bob.

Eden se Jay gaan pa word!

Daar is sowaar iets fout met die prentjie hier in die Winnie-the-Pooh-kinderkamer in die ruim huis in Pretoria. Die man met die punterig gejelde hare wat die tweejarige woelwater styf tussen die komberse vasdruk en nag soen, kan tog onmoontlik die stout seun van die sanggroep Eden wees.

Jay du Plessis (31) was dan in Oktober nog ’n geswore alleenloper en wilde partytjiedier. Beslis nie die vaderfiguur wat nou hier langs die blonde Aidan sit en vir hom ’n storie lees nie.

Hy sit sy een arm om die blouoog-seuntjie en vleg die ander om die vrou met dieselfde blonde hare en blou oë as haar seun. Hy trek hulle teen hom aan en erken: ‘‘Mia en Aidan Greeff het my so saam-saam getem.’’

Dit is skaars drie maande nadat Jay se pad met klein Aidan en sy ma s’n gekruis het, maar die seuntjie klouter gemaklik op Jay se skoot en gooi met ’n luidrugtige ‘‘Daddy!’’ sy armpies om die sanger se nek.

‘‘Wat is dit, my seun?’’ vra Jay en sy oë skitter meer as enige van sy tieneraanhangers s’n wanneer hy sy hemp op die verhoog uittrek. Dan kyk hy oor Aidan se skouertjies en kondig trots aan: ‘‘Ek en Mia het Sondag gehoor sy is swanger met ’n boetie of sussie vir Aidan.’’

Jay se hele uitkyk op die lewe het in November in ’n oogwink verander toe hy die 27-jarige Mia ontmoet het.
Jay en ’n paar enkellopende vriende het ná die Eden-man Paulo Azevedo se troue na die nagklub Presley’s in Pretoria gegaan om verder te kuier. Mia was toevallig die aand vir die eerste keer daar en haar vriendin Kristi het besluit hulle twee moet Jay van naderby leer ken.

‘‘Ons het ’n paar drankies gedrink en nie eens nommers uitgeruil nie; ek het net vir haar gesê ek tree die volgende week daar op en sy moet asseblief kom kyk,’’ vertel Jay. En Mia erken sy het moeite gedoen om daar te wees.
Die daaropvolgende Woensdag het hulle op hul eerste amptelike afspraak gegaan, en van daar af het dinge behoorlik vlam gevat.

Lees in Huisgenoot van 19 Februarie meer oor Jay van Eden en sy lieflike Mia se toekomsplanne.

JP Duminy kan doen – met R18 miljoen

Nie lank gelede nie het hy nog gebaai in die lekkerte nadat hy ’n enkele wedstryd in die Aussies se agterplaas help wen het met vyftig onoorwonne lopies in sy kriekettoetsdebuut in Perth. Onder ondenkbare druk. As plaasvervanger vir die beseerde Ashwell Prince. En nadat hy lank maar ’n soort water-aandraer in ’n Proteas-span met ’n sterk topses-kolflys was.

Daardie een JP Duminy-vertoning was reeds merkwaardig. Intussen het ’n ding of vyf gebeur, wat nou byname soos The Strandfontein Strokemeister en Mr Cricket in die oorsese media laat opduik. En kras kommentaar in koerantblogs Doer Onder uitgelok het: “Die bra patetiese pogings om die ‘Duminator’ te ontsenu deur uitgediende, stroewe, oorbetaalde, onderpresterende Aussie . . .’’ en so aan.

En hier sit JP Duminy nou oorkant ons in Nuweland en skud sy kop: “Jip, dis onwerklik, ’n bietjie oorweldigend.’’

Maar hier kort voor ’n krieket-oefening saam met die Nashua Cape Cobras praat hy al weer oor iets anders as die Proteas se onvergeetlike Aussie-toer. Naamlik oor die R18,9 miljoen wat die Mumbai Indians vir hom uitruk vir so altesaam twaalf weke se Twintig20-krieket in die Indiese Premierliga (IPL) in die volgende twee jaar.

“Dis oorweldigend om te dink ek kan daardie soort geld verdien,’’ sê die 24-jarige Kapenaar wat nog tot heel onlangs lekker in sy Opel Corsa GSI-LTD rondgery het. “Maar ek het eerlikwaar nog nie eens so ver gedink soos wat ek sou wou koop nie.’’

Hy het al gedink aan wat hy uit dié nuwe ondervinding kan leer. “Ja, dis baie opwindend; daar’s groot hype rondom die IPL en die prysetiket op my kop skep groot druk en verwagtinge,’’ sê hy met ’n skewe glimlag. “Maar ek sal dit allereers wil geniet en soveel moontlik uit my spel saam met Sachin Tendulkar en Sanath Jayasuriya wil leer.’’

Hy dink uiteraard al aan die Wêreldbeker in Indië. “Dit sal wonderlik wees om daar te kan wees.’’ Hopelik kan hy ook as bouler ’n bydrae maak.

Hy besef goed watter enorme verwagtinge op sy skouers rus. “Ek kan nou net so bestendig moontlik probeer wees, nederig bly, dieselfde voorberei, dieselfde dinge reg doen.”

Lees in Huisgenoot van 19 Februarie meer oor die krieketheld JP Duminy.

James Small leef nou vir sy Ruby

’n Vrolike kinderlaggie klink deur die leë huis. “Wat wil jy hê, pumpkin pie?” vra hy in sy diep rasperstem. Hy steek ’n getatoeëerde arm uit en tel die fraai meisietjie met een beweging in sy arms.

James Small se neonpienk T-hemp en die tatoes op sy bultende arms tref eerste jou oog. Op sy linkerarm is die skattige kleuter se naam in krulletters geëts: Ruby.

Jare lank is hy as die stout seun van Suid-Afrikaanse rugby gebrandmerk; meer onlangs ook as vroueslaner. Maar wanneer dié oud-Springbokvleuel sy vierjarige dogtertjie neersit en haar hand in syne neem, is hy so mak soos ’n lammetjie.

Dit is die eerste keer in jare dat James ’n onderhoud toestaan, en ook die laaste keer dat hy oor dié dinge praat, sê hy. Vandag wil hy dit duidelik maak: Die man wat selfmoord probeer pleeg het en sy eksmeisie en Ruby se ma – die bekende model en aktrise Christina Storm – aangerand het, bestaan nie meer nie.

Ná sy storm-en-drang-jare is hy nou, op veertig, gelukkiger as ooit tevore. Al wat nog pla, is die verwytende blikke van die publiek wat hom steeds as
’n vroueslaner beskou – des te meer nadat Christina en haar nuwe vriend, Munro du Toit, ’n oud-Idols-finalis, onlangs kaalbas vir die tydskrif Marie Claire poseer het vir ’n bewusmakingsveldtog teen vrouemishandeling. Sy het toe weer genoem dat sy in so ’n verhouding was.

Hy het al erken hy het Christina geslaan in hul agt jaar lange verhouding wat in 2004 tot ’n einde gekom het, maar nog nooit openlik daaroor uitgewei nie.

Toe hy die artikel sien, het hy sowaar verlig gevoel, sê hy nou. Hy het gevoel dit stel hom in ’n baie swak lig, en hy het geweet dit is sy kans om nou self oor dié dinge te praat. Daarmee saam wil hy ook dié hoofstuk in sy
lewe afsluit.

“Ek wil my kant van die saak stel – vir my kind se onthalwe. Ek leer haar om haar man te staan. Eendag gaan sy my vra: ‘Pappa, hoekom het jy jouself nie verdedig nie?’ ”

Lees in Huisgenoot van 19 Februarie meer oor James Small en sy dogtertjie, Ruby.

Thys word ’n bruilofklong

Die strelende klanke van vioolmusiek dans in die oggendlug en ’n vrolike atmosfeer heers onder die gaste. Die rooikop-man-van-die-oomblik voel effens benoud in sy deftige pak – veral toe die vioolspeler lostrek met Celine Dion se My Heart Will Go On.

“Jong, is dit nie daai liedjie wat gespeel het toe die Titanic gesink het nie? Ek hoop nie dis ’n teken nie,” spot Thys Streicher (34), ook bekend as Die Bosveldklong.

Vandag kry die sanger en komediant die strop om die nek en die senuwees knaag nogal hier in die tuin van die spoggerige Café Gannet met sy pragtige uitsig oor die see by Mosselbaai.

Die trompetspeler begin die troumars speel en toe, alte pragtig in ’n ivoorkleurige trourok van die ontwerper Annie P, kom Debbie van Deventer (32) aangestap.
En daar langs die dominee, dr. Pieter de Jager met sy groen das (Thys noem hom die Outsurance-man), kan g’n mens die breë glimlag van die bruidegom se bakkies afgevee kry nie.

Pieter se knieë het gelukkig darem ophou bewe – net ’n dag tevore het hy saam met Thys, ’n regte adrenalienvraat, by die Gourits-brug gereksprong.

Sy boodskap is kort en kragtig. “Onthou altyd die woordjie ’bravo’,” sê hy. “Die B is die boustene van die huwelik – julle moet begrip vir mekaar hê. Die R is vir
respek – julle moet so optree dat julle mekaar se respek verdien. Die A staan vir aanvaarding – julle moet mekaar aanvaar soos Christus julle aanvaar. Die V staan vir vertroue en die O vir openhartigheid, een van die belangrikste boustene van die huwelik.”

En voor jy kan sê Titanic, is Thys en Debbie meneer en mevrou, en almal kuier in die restaurant. Daar smul die gaste alte heerlik aan Thaise hoenderkebabs, seekos-paella, wildspotjie, gevulde hoenderborsies, kraakvars slaaie en nog wat, gevolg deur pure dekadensie – ’n sjokoldade-fontein, malvapoeding, kaaskoek en aarbeie vir die lafhartiges.

“Ek het die mooiste vrou,” sê Thys toe hy sy toespraak hou. “Ek is baie lief vir jou en dankie dat ek jou man mag wees.”

Lees in Huisgenoot van 19 Februarie meer oor Thys Die Bosveldklong en sy nuwe vrou.

Sterre sê tot siens aan Trudie Taljaard

Trudie Taljaard se vriende en geliefdes het meer gelag as gehuil by haar gedenkdiens by die Fourways Memorial Park-kerk in Johannesburg. Die legendariese aktrise is vir oulaas staande toegejuig en almal het staaltjies vertel om haar vol lewe te vier.

Vinette Ebrahim, Charmaine van 7de Laan, het ’n roerende brief van Trudie se eerste man, die akteur Errol Ross, voorgelees. Elzabé Zietsman, wat deesdae in Binnelanders te sien is, het in haar huldeblyk gesê sy gaan dertig laventelbosse vir haar ‘‘juffrou’’ plant. Sy het ná die diens ’n bossie laventel aan Trudie se dogter Justine Underhay oorhandig – dié blom was haar ma se gunsteling.

Trudie het voor haar dood gevra dat haar as by Cintsa in die Oos-Kaap gestrooi word, waar sy en haar kinders hul lekkerste vakansies gehou het.

Brad Pitt – in lewende lywe

Dis vrek moeilik om te konsentreer. En dis alles Brad Pitt se skuld.

Daar staan ek, mikrofoon in die hand by ’n mediakonferensie in Parys – Parys, Frankryk, nie Vrystaat nie – en reg met ’n slim vraag. Tot die Adonis se blou kykers my bruines vang.

En ek vra iets en hy praat iets, maar my ore skakel ’n ruk lank af, want ek kan nie ophou kyk na hom nie. Kan jy dit oorvertel – ’n glimlaggende Brad Pitt praat met mý! En dit nogal in een van die mees romantiese stede ter wêreld.

Daar sit hy, in ál sy aantreklike glorie op ’n verhogie net ’n katspoegie van my af. Grys keps op die kop, donkergrys-swarterige trui, donkerkleurige jeans, modder aan sy swart stewels. Mooier as ’n mens.

Hy’s hier vir die bekendstelling van sy nuutste fliek, The Curious Case of Benjamin Button. Dit is ’n Oscar-voorperd met dertien benoemings, onder meer vir beste akteur vir Brad.

En ons is hier, tweehonderd joernaliste van oor die wêreld – benewens nou ek van Suid-Afrika – om vrae te vra. En in my geval, om my totaal te vergaap.

Maar wag . . .

Kort voor die roomkleurige deure van die konferensiekamer hier in die spoggerige Hotel Bristol in die hartjie van Parys oopgeswaai het, skarrel almal rond om alles agtermekaar te kry.

’n Aantreklike ou met oorfone op sy kop en ’n knyperbord in die hand stap op en af, kou kougom en beduie vir die klankmanne.

Die Europese joernaliste is ’n ander spesie. Almal staan netjies tou en niemand druk nêrens in nie. Behalwe ek – ek stap by almal verby tot heel voor en niemand gluur my eens aan nie.

Die spul lyk nie juis of hulle wil flou word oor die vooruitsig om Die Bradster oor ’n paar minute te sien nie. Behalwe ek. Ek wil eintlik gil: BRAAADDD, ek is hierrrrrrrrr! Dis BRAAADDD, menseeeeeeee!

’n Franse kameravrou vra verbaas of ek dan heelpad van Suid-Afrika gekom het. Natuurlik! Dis darem Brad – ek sou selfs Noordpool toe sukkel net om daai man te sien.

Lees in Huisgenoot van 12 Februarie die skrywer Haidee Muller se humoristiese vertelling oor die dag toe sy met Brad Pitt gepraat het.

– The Curious Case of Benjamin Button begin op 27 Februarie draai.

Huldeblyk aan Trudie Taljaard

Hulle het saam die ou dae onthou, soms geglimlag, selfs ’n liedjie saam gesing. Dit sou die laaste besoek wees. Albei het dit geweet.

Toe Elzabé Zietsman daardie laaste dag van Januarie vir haar ou vriendin en dramadosent in die sorgsentrum in Johannesburg gaan kuier het, het sy geweet dit is tyd om te groet.

Nogtans het die sterwende Trudie Taljaard (60), deurtrek van die beenkanker wat voorverlede jaar by haar gediagnoseer is, moedig geglimlag en selfs saam met Ziets geneurie toe die sanger vir haar Sinead O’Connor se Scarlet Ribbons sing.

Daarna was dit Elzabé se weergawe van Julia Fordham se Behind Closed Doors. ‘‘Behind closed doors, You’re mine, I’m yours. We’ve got our own language and that’s about all. Stripped to the bone, I’m happy alone. And wherever I’m going, I’m going there on my own,’’ het sy vir haar ‘‘juffrou’’, soos sy haar steeds onthou, gesing.

Saam het hulle teruggedink aan Trudie se jong dae.
‘‘Onthou Juffrou nog my heel eerste dramales?’’ wou Elzabé weet by die vrou wat haar in 1979 as student by die destydse Pretoriase Technikon onder hande geneem het. ‘‘Onthou Juffrou nog hoe ’n mens liefde op die verhoog wys sonder om ’n woord te sê?’’

Waarop Trudie stadig haar hand van die bed af opgetel het, haar handpalm teen Elzabé s’n gevryf het, en Ziets met haar vingerpunte liggies oor Trudie se handpalm gestreel het.

Dit was ’n kosbare paar minute, vertel Elzabé, die trane blink in haar oë. ‘‘Sy is oorval deur besoekers. Daar was geweldig baie mense, en ek was gelukkig om tien minute alleen saam met haar te kry.’’

Die volgende oggend het die boodskap gekom: ‘‘Trudie het gisteraand haar goue vlerkies gekry en eersteklas gevlieg.’’

Sy was weg.

In Huisgenoot van 12 Februarie bring ons hulde aan Trudie Taljaard die ikoon, vegter en formidabele aktrise en leermeester.

Idols se mooi, besige Liezel

Sy’s blond en begeerlik, met bene wat strek van die Kaap tot in Kaïro. En as een besondere aspirant-Idol tot
onlangs geen benul gehad het wie Liezel van der Westhuizen is nie, dan weet hy dit nou.

As die nuwe aanbieder van dié werklikheidsreeks was dit Liezel wat die wagtende hoopvolles buite Kaapstad se oudisiesaal moes moed inpraat. Maar toe iemand die deelnemer vra wat hy van Liezel dink, vra hy: “Wie’s Liezel?”

“Sy staan reg agter jou,” kom die antwoord. En toe hy omdraai, verstar hy omtrent by die aanskoue van die wese met die eindelose bene. “Sy’s sexy!” was al wat die arme man kon stamel.

By Idols het woedende deelnemers al op haar geskree en opdringerige ma’s haar al gedreig. Heelparty ouens – en selfs ’n paar meisies – het haar telefoonnommer gevra. En in haar eerste week het sy per ongeluk die uitvoerende vervaardiger vir vier uur in die grimeerkamer toegesluit. Maar dis alles deel van ’n dag se werk vir die koelkop.

“Ek weet ek het groot skoene om vol te staan,” erken sy.
Sy was geskok toe sy hoor sy het die pos as aanbieder gekry. “Ek het regtig nie gedink ek het ’n kans nie,” sê Liezel. Colin Moss was baie gaaf en het haar allerhande raad gegee.

Op die program word baie agter die skerms gelag, veral oor poetse vir die gemeenste beoordelaar, Randall Abrahams. “Hy het ’n goeie voorraad lekkers wat hy onder sy lessenaar wegsteek, maar almal weet daarvan. Die stelwerkers het my uitgedaag om sy sjokolade te steel. Hy was vreeslik vies,” sê Liezel laggend.

Haar gunsteling-beoordelaar is Mara Louw. “Sy is so vriendelik. Ons praat oor skoene en ouens. Sy het wonderlike skoene-smaak.”

Onder die deelnemers het Liezel reeds moontlike wenners in die oog. “Ek het my gunstelinge, maar die besluit berus op die ou end by die beoordelaars en die gehoor se stemme.”

Ons sal sien of sy in die kol was . . .

Lees in Huisgenoot van 12 Februarie meer die besige nuwe Idols-aanbieder.

Lonwabo Tsotsobe, die Baai se held

Die oorverdowende klanke wat buite die geel huis in KwaDwesi in Port Elizabeth deur die buurt weergalm, klink op uit ’n piepklein wynrooi 1300 Toyota Tazz.

Die Proteas se nuwe staatmakerbouler, Lonwabo Tsotsobe, rank tot sy volle 1,95 m uit die karretjie en lag trots.

‘‘Ek het hom ’n bietjie ge-pimp, wil jy hoor?’’ En hy gooi sommer dadelik al die deure oop.

Hy draai die volumeknoppie nóg verder oop. Die kattebak is tjokvol luidsprekers. Maar hy het darem plek gelos vir sy krieketkolf en -bal, grinnik Lopsy, soos hy homself gemoedelik voorstel.

Op die agterruit pryk ’n tuisgemaakte plakkaat: ‘‘Lonwabo Tsotsobe Welcoming Party’’ met foto’s van hom. ’n Vriend reël juis nou die amptelike verwelkomingspartytjie in ’n plaaslike klub vir die nuwe held van die Baai. Maar vandag kuier almal by sy suster Nomsebenzi se huis.

Terwyl ons op die stoep sit en gesels oor sy heel eerste internasionale eendagwedstryd ’n paar dae tevore op Perth se beroemde Waca-krieketveld waar hy die Aussies behoorlik moedeloos geboul het, kom die gaste drupsgewys aan.

Party stop eers in die deur en vertel staaltjies van hoe hulle saam met hom in Stemelestraat, KwaMagxaki, die buurt net langsaan, met tennisballe en broodkratte vir paaltjies begin krieket speel het.

Daardie dae het die wenspan dae agterna nog vertel hy is “die kampioen”. Amper soos Lonwabo (24) vandag met trots kan sê sy span, die Proteas se eendag-manne, is die beste ter wêreld.

En almal praat oor sy leeue-aandeel in daardie vyfde en laaste eendagwedstryd toe hy ’n allemintige vier paaltjies laat kantel het. Een van dié paaltjies was boonop ’n vangskoot wat hy van sy eie boulwerk benut het.

“Sjoe, dit was ’n groot dag wat ek altyd sal onthou,” sê Lonwabo met blink oë. Toe die eerste paaltjie val, was hy tevrede, want dit was reeds ’n droomdebuut.

“My eerste internasionale eendagwedstryd, ’n paaltjie, alles het verloop nes ek daarvan gedroom het,” sê Lonwabo van daardie oomblik toe hy die Australiese aanvangskolwer Shaun Marsh se paaltjies ná net vyf lopies omgeboul het.

Maar dit was net die begin . . .

Lees in Huisgenoot van 12 Februarie meer oor die staatmaker-bouler Lonwabo Tsotsobe.

Ferdinand Rabie is weer verlief

Hy het die skoot so hoog deur dat hy selfs soggens vir haar toebroodjies maak om saam te vat werk toe. En as die beeld van die fuif-prins Ferdinand Rabie wat in die kombuis staan en toebies maak half onwerklik klink, is dit net omdat hy lank laas so verlief en verlore was.

‘‘Kyk, ek maak elke oggend vir haar mooi broodjies en pak selfs vir haar koeldrank werk toe in,’’ vertel Ferdi, duidelik ingenome met homself.

Sy twee vriendelike golden retrievers, Coco en Fica, kom stertswaaiend by die deur van sy huis in Welgemoed, Bellville, groet. ’n Jaar gelede was hul baas ’n droewige figuur toe hy aankondig hy gaan skei, maar vandag is hy die ene glimlagge terwyl hy van sy nuwe liefde praat.

Die eerste wenner van die plaaslike Big Brother-reeks en Adi Gamadi, ’n Israelies-gebore skoonheid wat by ’n lugdiens in Kaapstad werk, het mekaar so agt jaar gelede in ’n klub ontmoet. Toe hulle mekaar onlangs weer raakloop, was die vonk nog daar.

Adi (31) het voorheen vyf jaar in die Kaap gewoon voor sy New York toe getrek het, maar noudat die liefde haar hier in haar gunsteling-wêreldstad getref het, gaan sy nêrens heen nie.

“Ons het mekaar ontmoet toe sy 21 en ek 23 was,” vertel Ferdi (34). “Ons het mekaar altyd by partytjies raakgeloop. Toe ons mekaar onlangs weer sien, het gevra of ek haar nommer kan kry.”

Die die twee is nou reeds vier maande saam en dolverlief. Die nuwe liefde het ook sy sosiale lewe beïnvloed – deesdae kry jy hom eerder by sy huis aan die kuier saam met goeie vriende en familielede as by ’n lawaaierige partytjie.

“Die opwindendste ding omtrent Adi is dat niks haar van stryk bring nie. Sy het my voor Big Brother leer ken. Sy is die mees plat op die aarde mens wat ek al ontmoet het. Sy kalmeer my.”

Op haar beurt sê Adi daar is niks vals omtrent Ferdi nie. “Hy het glad nie verander nie. Daar is nie ’n openbare persona nie. Hy is net homself. Almal is dol oor hom.”

Lees in Huisgenoot van 12 Februarie meer Ferdinand Rabie se nuwe liefde.