Nog ’n boer verloor ’n vrou

Sal ons ooit daardie oë vol trane vergeet, die lippe wat bewe terwyl hy ná ’n prettige dag saam met tien hoopvolle meisies aankondig nie een van hulle is sy droomvrou nie . . . Dat sy hart aan iemand anders behoort?

Dis gesteel deur ’n “meisietjie” wat ook ingeskryf het, maar te besig is om op die TV-program Boer Soek ’n Vrou te verskyn, het Tiaan Naudé (34) van Cradock vertel.

Maar sy prinses het toe nie soos in ander sprokies in sy arms geval om vir ewig en altyd gelukkig daar te lewe nie . . .

Hesmari de Ridder (30), ’n skakelbeampte by ’n regsfirma in Kaapstad, is trouens steeds verbysterd oor hoe een onskuldige briefie ses maande gelede aan haar lewe kom karring het.

Noudat sy mag, sê sy reguit: “Daar was nooit ’n verhouding nie en ons was nooit ’n paartjie nie.”

Dit was vir haar glad nie ’n lekker ervaring om so in die openbare oog te wees nie, sê die blonde marathon-hardloper. Sy wens nou sy het haar voet uit die staanspoor dwars gesit en volstaan met haar onttrekking.

“Toe hulle my die eerste keer bel, het ek my disnis geskrik en besef ek is te privaat en glad nie uitgeknip hiervoor nie. Ek en Tiaan het oor die foon gepraat en ons het mekaar vlugtig ontmoet, maar ek wou nie deelneem nie.

“Toe ek my oë uitvee, het hy – sonder om dit vooraf met my te bespreek – aan die organiseerders gesê hy het klaar gekies en stel nie belang in die ander nege finaliste wat
hy uit 167 briewe van aspirant-boerinne gekies het nie.

“Hulle het besluit hy kondig dit so aan op die dag wanneer hy saam met die ander finaliste kuier en dat ek dan in ’n volgende episode saam met hom in die program verskyn.

Hesmari het toe maar ingestem en ook om vir die laaste episode saam met Tiaan en die ander paartjies die naweek saam by Clanwilliam deur te bring.

“Ek het saamgewerk,” sê sy, “maar wil nou net van die hele besigheid vergeet.”

Lees in Huisgenoot van 5 Februarie meer oor Tiaan die TV-boer se hunkering na die een wat weggekom het.

Laan se Altus raak verloof

Hulle het keer op keer na die berg in die verte gekyk en gedreig om dit die volgende oggend te gaan uitklim. Die sonsopkoms oor die Oos-Kaapse vlaktes rondom Cradock sou van daar asemrowend wees, het die verliefdes vermoed.

Maar elke keer was óf die een óf die ander op die nippertjie nie lus om ligdag uit die vere te kruip nie.
Tot die dag ná Kersfees toe Heino Schmitt (26), oftewel 7de Laan se aantreklike sakeman Altus, uiteindelik besluit: Dis nou of nooit.

Die donkerkop met die lenige lyf wou eers ’n bietjie voorbereiding doen voor hy sy meisie van vyf jaar, BeauAnn Jordaan (23), uit die bed boender om haar op haar ouers se plaas bergop te vat.

Hy het op Kersdag alleen die hang van die berg uitgeklim en op die boonste piek op ’n klip met ’n koki-pen gaan skryf: ‘‘This is how you make me feel.’’

En toe het hy die leë boksie vir die verloofring wat hy maande tevore reeds laat ontwerp en gekoop het, langs die boodskap op die klip gesit voor hy weer bergaf is . . .

‘‘Die volgende oggend het ek BeauAnn vieruur wakker gemaak en gesê ons moet klim. Ek het ’n kombers, jogurt, aarbeie en bessies in my rugsak gepak en ons het begin. Sy wou kort-kort rus, maar ek het gesê ons moet eers bo kom,’’ sê Heino.

En net toe hulle bo kom en BeauAnn die boksie op die klip gewaar en die boodskap lees, het die son sy kop bo die horison uitgesteek.

Daar’s ’n rustigheid in sy oë toe die man wat ook vlot Frans en Duits praat, na sy verloofde draai. ‘‘Daar’s ’n spreekwoord in Duits: ‘Es gibt Berge über die man hinüber muss, sonst geht der Weg nicht weiter.’ (Daar is berge wat ’n mens moet oor, anders loop die paadjie nie verder nie.)

‘‘Toe ek en BeauAnn daar op die bergspits staan, het ek vir haar gesê: ‘Dít was my berg, die berg wat ek moes klim. En nou kan die paadjie aangaan.’

Lees in Huisgenoot van 5 Februarie meer oor Heino en sy verloofde BeauAnn.

Johan Botha, SA se krieketheld

Vir iemand wat al so ’n laagtepunt soos die Oos-Kaapse draaibalbouler Johan Botha te bowe gekom het, was dit ’n ongelooflike hoogtepunt om die span te kon aanvoer wat nou ook ’n eendagreeks in die agterplaas van die wêreldkrieketreuse gewen het. En hoe het hy nie gelei nie . . .

‘‘Baie dinge was ten gunste van ons, maar ’n mens moet altyd goed speel om die Aussies te klop,’’ sê Johan uit Perth kort voor die Proteas se vyfde eendagwedstryd daar. Hy is as Graeme Smith se adjudant vir die eendagreeks aangewys nadat die Protea-kaptein ná die laaste wedstryd in die toetsreeks nie verder kon speel nie.

‘‘Almal het goed saamgespan, maar veggees was die groot ding,’’ sê Johan.

En Johan ken van aanhouer wen. In sy toetsdebuut in Sydney in Januarie 2006 is hy oor sy boul-aksie uitgewys en toe verbied om internasionale krieket te speel tot hy dit regstel. Maar hy het heelpad teruggeveg, tot sy sleutelrol nou in die Proteas se sege.

Sy terugkeer na Sydney was skouspelagtig. Hy’t die openingskolwer, Shaun Marsh, se paaltjie geneem, kaptein Ricky Ponting s’n ook, Brad Haddin van sy eie boulwerk af uitgevang, toe vir James Hopes en Nathan Hauritz uitgevang en sommer ook die wenvier gemoker. Dit alles net in die derde eendagwedstryd.

Met sewe paaltjies altesaam was hy naas Makhaya Ntini en Dale Steyn (albei agt) die topbouler in die eerste vier eendagwedstryde. Met boul-ekonomie as maatstaf was hy stellig die beste. Boonop het hy die vangskote ingeryg.

‘‘My hoof-jop as speler is om die lopietempo te beperk en so druk toe te pas. Tog is dit altyd lekker om spelers soos Ponting en Hussey uit te kry,’’ sê Johan.

Maar die eer kom die span toe: ‘‘Almal het baie hard gewerk. Hiervandaan is dit terug na Suid-Afrika vir nog ’n groot reeks. Dan begin ons weer nul-nul teen die Aussies; ’n paar van hul beseerdes kan dan fiks wees en hulle sal sterk wil terugkom. Nou moet ons nederig bly en steeds hard werk.’’

Lees in Huisgenoot van 5 Februarie meer oor die Protea-held Johan Botha se terugkeer.

Kate en Leo laat die vonke spat op die groot skerm

Dit was die fliek-romanse van die dekade, ’n liefde wat oor alle grense heen geblom het, net om in die ysige waters van die Atlantiese Oseaan te eindig. Wie het nie ’n traan gestort oor die tragiese afloop van Titanic nie?

Ons wou almal hê Jack en Rose moes saam oud word.
Geen wonder ’n nuwe fliek waarin die sterre van daardie mega-treffer van 1997 in nog ’n liefdesverhaal herenig word, het die wêreld nou gaande nie.

Kate Winslet en Leonardo DiCaprio is ’n getroude paar in die ontstellende nuwe drama Revolutionary Road, wat al benoemings vir verskeie toekennings soos die Satellite-pryse en die Oscars ingeoes het sedert dit op 23 Januarie uitgereik is.

Hulle het Hollywood behoorlik aan die gons – Kate nou ’n slanker en blonder weergawe van haar ou self en Leo, wie se seunsagtige sjarme vir ’n smeulende aantrekkingskrag plek gemaak het.

“Ek en Leo het altyd geweet ons sou weer saam werk,” sê Kate. “Ons het ’n emosionele snelskrif, ’n fisieke gemaklikheid omdat ons mekaar al so lank ken.”

Leo beaam dit: “Oor die jare het ek vir myself gesê: ‘Ek weet nie of ons dit weer moet doen nie.’ En dan het ek gedink: ‘Wat is jy, ’n idioot? Hoekom sou jy nie saam met die beste aktrise van haar geslag wou werk nie?’ ”

En die feit dat Kate se man, Sam Mendes, die regisseur is van die fliek waarin Leo en Kate twee witwarm sekstonele het, maak dinge natuurlik net nog interessanter.

Revolutionary Road gaan oor Frank en April Wheeler, twee mense wat worstel met die verlies van hul drome.

Kate sê die sekstonele wat sy en Leo voor haar man moes skiet, het haar deeglik ontsenu.

“Ek het bly sê: ‘Dit is te vreemd.’ En dan laat hoor Leo: ‘Ag, toe nou.’ En ek sê: ‘Ja, maar onthou, jy is my beste vriend. Hy is my man.’ ”

“Ek het net vir haar gesê: ‘Dit voel nie vir my vreemd nie – dis net toneelspel,’ ” sê Leo. “Dit was vir my iets heel gewoons omdat ek Titanic saam met haar gedoen het.”

Lees in Huisgenoot van 5 Februarie meer oor hoe Kate en Leo ná Titanic geskitter het.

Gina Athans vind weer geluk

In haar eina rooi rokkie met ’n brakkie in ’n ontwerpershandsak sou jy dink dis een van Hollywood se vlinder-flerries wat met swaaiende heupe in Kaapstad by ’n modelagentskap inwarrel.

Maar nee, dis ons eie topmodel Gina Athans (24), wat met ’n glinsterende glimlag soentjies en drukkies uitdeel.

Die wip in haar stap is nie toevallig nie, sê die beeldskone brunet met die wilgerlatlyfie. Dit gaan beter as ooit tevore en sy is sielsalig gelukkig.

Die vonkies in haar bokkie-oë het ook iets te doen met ’n nuwe liefde, hoor jy later, maar sy’s baie geheimsinnig oor die uitlander wat in die afgelope Kersvakansie haar hart gesteel het.

Dit is met goeie rede dat Gina lugtig is om oor haar liefdeslewe te praat. Die warrelwind-romanse wat tot haar sprokiestroue met die Jordaniese miljoenêr Eyhab Jumean gelei het, het baie hartseer geëindig toe hulle twee jaar gelede geskei is.

Sy is intussen deur diep waters. Maar vandag, moet sy net nog ’n slag sê, is sy ‘‘baie, baie gelukkig’’.

‘‘Vir die eerste keer in my lewe is ek honderd persent gelukkig. My egskeiding het my geleer as iets jou nie doodmaak nie, maak dit jou sterker.’’

Gina se eie sakebelange is baie goed op dreef, soos die motorwassery wat sy onlangs in Johannesburg begin het. Sy het pas ’n tweede woonstel in Kaapstad gekoop.

‘‘Ek is ’n entrepreneur in murg en been. Ek het ook begin klere maak, want ek kan nie meer dieselfde duur klere bekostig as toe ek ’n miljoenêrsvrou was nie.

‘‘Houtwerk is my ander nuwe stokperdjie en as ek weer sien, staan ek in ’n ysterwarewinkel. Ek skuur af en maak reg en vernis.’’

Sy is ook nou meer onafhanklik. ‘‘Ek is in beheer van my eie finansies. Ek kry raad by ’n rekenmeester en ’n prokureur,’’ sê sy.

‘‘Ek is miskien nie getroud nie, maar my lewe is wonderlik stabiel. Ek wil nie meer ’n hartseer, gebroke poppie wees nie. Dit irriteer my as mense my met handskoene hanteer en maak asof ek so broos is. Ek is ’n baie sterk vrou.’’

Lees in Huisgenoot van 5 Februarie meer oor hoe Gina weer geluk gevind het.

Gebroke harte word geheel

Ferdinand Rabie het ná sy egskeiding verlede jaar weer liefde gevind. Die wenner van die eerste Big Brother-reeks is smoorverlief op Adi Gamadi, ’n sangeres. Die twee ken mekaar al langer as agt jaar, maar die romanse het eers vlam gevat toe hulle mekaar onlangs in ’n nagklub raakgedans het.

“Ek is so verlief,” het Ferdinand gesê toe ons die twee by die L’Ormarins Queen’s Plate-wedren by die Kenilworth-renbaan in Kaapstad raakloop. Adi, ’n Israeli met ’n Suid-Afrikaanse ma, het vyf jaar in Kaapstad gewoon voor sy New York toe getrek het.

So van die liefde gepraat – die rugbyster Bryan Habana en sy verloofde, Janine Viljoen, is steeds dolverlief. “Ons is nou al ’n maand verloof en dis louter plesier,” het Bryan ingenome vertel.

Die sanger Louise Carver het dié dag haar dertigste verjaardag gevier en ook daar opgetree. “Aan al die jong vroue wat ’n bietjie verlore voel, daar’s hoop: Alles werk in jou dertigs uit!’’ het sy laat hoor en stralend na haar kêrel, die akteur Emmanuel Castis, geloer.

En hoe het hy sy meisie op haar verjaardag bederf? “Ek het vir haar pannekoek gebak en dit in die bed voorgesit.”

Seerkry is vir sissies

Selfs al was Schalk Burger se enkel in verbande toegewikkel, het dit nie die Springbok gekeer om voet in die hoek te sit by die onlangse Chevrolet Corvette Track Day op die Kyalami-renbaan in Midrand nie.

‘‘Ek het ’n klein operasie aan my enkel gehad, maar dit sal binne tien dae weer gesond wees. Vandag gaan ek resies jaag!’’ het die blonde flank uitgeroep.

Die 5FM-aanbieder Elana Afrika het haar nie deur die manne laat intimideer nie – sy’t self laat wiel toe sy agter die stuur inskuif. Sy het heeldag van oor tot oor gestraal – en ja, sy’s verlief.

‘‘Ek het die afgelope drie jaar net met mans uitgegaan wat nie Suid-Afrikaners is nie. En toe ontdek ek die beste man van almal woon in Suid-Afrika,’’ het sy opgewonde vertel. ‘‘My kêrel, Gilan Gork, ’n entrepreneur, is ’n juweel. Dit gaan baie goed met ons.”

Die Bok en die blink klippie

Jammer, meisies, hierdie aantreklike pot het nou sy deksel gekry. Die Springbok-senter Jaque Fourie het onlangs verloof geraak aan sy meisie van die afgelope tien maande, Kelly Rae Liebenberg.

‘‘Ek het al ná twee maande geweet sy’s die een vir my,’’ het hy gesê toe ons die twee by die Kloofzicht Lodge aan die voetheuwels van die Zwartkopberg naby Krugersdorp kiek. Jaque het by hierdie luukse oord die jawoord gevra en die paartjie oorweeg dit om ook daar te trou.

‘‘Jaque het roosblare oor die bed gestrooi en die verloofring was tussenin. Ons wou eers in Maart trou, maar hy wil hê al sy rugbyvriende moet ook daar wees. Toe verskuif ons die troue na 30 Mei,’’ vertel Kelly Rae, ’n huisagent en deeltydse model.

Jaque oefen nou hard vir die Super14-reeks en laat al die reëlings aan sy donkerkop-verloofde oor.

Sweepslag se Maurice vind sy pa

Hy was ’n japsnoet van twaalf toe die vreemdeling met die gawe oë en die gul glimlag by sy tannie se huis in Bloemfontein kom kuier het.

Die man het belangstellend oor sy lewe uitgevra en vir hom ’n paar blink muntstukke gegee voor hy weer vort is. ‘‘Jis, daai was ’n gawe oom,’’ het die seuntjie gedink voor hy die man in sy herinneringe gebêre het.

Maurice Carpede (41) se tannie sou eers jare later vir hom sê dié ‘‘gawe oom’’ was sy pa. En amper twee dekades nadat hy pa Mike vir die eerste en laaste keer gesien het, het hy besluit om na hom te gaan soek.

‘‘Dit was so sewe of agt jaar gelede. Ek het nie lank daaroor gewroeg nie. Ek het net op ’n dag besluit ek wil my pa ontmoet,’’ vertel die aanbieder van die gewilde SABC2-musiekprogram Sweepslag en Jacaranda 94.2 se oggendprogram met ’n veraf kyk in sy oë.

‘‘Ek het by ’n vriendin van my ma gehoor wat my pa se adres was en by sy huis in Bloemfontein gaan aanklop. ’n Meisie het die deur oopgemaak, ‘hallo’ gesê en toe weggestap. ’n Paar sekondes later het sy teruggekom en gesê: ‘Skuus, ek dog jy’s my broer.’ ’’

Tsholofelo Magau was tereg verward, want Maurice het op ’n haar nes haar ouboet, Seabelo, gelyk. Hulle was immers halfbroers. Daardie dag het Maurice sy familie vir die eerste keer leer ken.

‘‘Toe ek en my pa begin gesels, was dit nie eens ongemaklik nie. Hy’t vir my gevra of ek wil weet hoekom dinge tussen hom en my ma skeefgeloop het en ek het gesê dis die verlede, dis hul sake.

“Ek wou net by hom hoor of hy bereid sou wees om my as sy seun te aanvaar en of ek hom as my pa kon aanvaar.’’

Sy glimlag is sag. ‘‘Die jare het nie die ooreenkomste tussen ons uitgevee nie. Ek lyk en is nes my pa – my hande, my stap . . .’’

Lees in Huisgenoot van 29 Januarie meer oor Maurice Carpede se sorgelose kinderjare.

Tienerster Nádine raak mooi groot

Ons ken haar as die kinderster wat as’t ware voor Suid-Afrikaanse musiekliefhebbers se oë grootgeword het en met treffers soos Krappies en Krefies en later Kaapse Draai in hul hart gekruip het.

Maar vandag sit ’n goue meisie hier voor ons in die son. Nie net skitter Nádine van kop tot toon met haar goue oogskadu, ’n Louis Vuitton-horlosie aan haar pols en ’n gebreide goue toppie wat netjies by haar ewe goue skoene pas nie, sy is ook reg om haar eerste internasionale album in goud te verander.

This Time I Know is al in November verlede jaar in Suid-Afrika uitgereik en haar aanhangers en resensente is gaande daaroor. En nou wil sy daarmee haar debuut in die internasionale musiekwêreld maak.

Die album word tans aan verskeie Europese lande aangebied en sal in Junie of Julie daar uitgereik word. En as die Europese radiostasies dit eers begin speel, wil sy daar konserte hou.

En met haar nuwe album wys die sanger, wat nou die dag nog die baba van die Suid-Afrikaanse musiekbedryf genoem is, dat sy haar kinderskoene ontgroei het.

‘‘Ek sal nooit my wortels vergeet nie,’’ sê sy van haar musiek in die beginjare, ‘‘maar as dit by my stem en optredes kom, wil ek nie as die baba bekend wees nie. Ek is ’n kunstenaar wat my skoene kan vol staan tussen al die ander kunstenaars.’’

Sy het op die nuwe CD nie aan haar styl getorring nie, maar wel ’n klemverskuiwing gemaak. Sy wou meer van Nádine die sanger as Nádine die performer vir haar aanhangers wys. Daarvoor het sy stemafrigting gekry, verduidelik sy.

Sy het ook effens aan haar voorkoms geskaaf. ‘‘Ek wil nie meer hê mense moet dink ek is vyftien of sestien nie. Ek het grootgeword.’’ Daarom het sy nou die blink korsette waarin sy altyd opgetree het, uit haar kas gegooi.

‘‘Ek is nie nou anders as wat ek voorheen was nie. ’n Mens is wat jy is. Maar ek wil nie hê mense moet na my kyk en sê: ‘Weet jy, as sy nou eendag groot is, sal ek ook haar CD koop’ nie.’’

Wen ’n CD

Dertig lesers kan elk ’n kopie van Nádine se CD This Time I Know wen. SMS net voor 5 Februarie NADINE na 34922. Elke SMS kos R2.

Lees in Huisgenoot van 29 Januarie meer oor Nádine se toekomsdrome.

Hok toe met glansmense se kroos

Al was ma Sonia Raciti-Oshry, die hoofbeoordelaar van Mej. SA, die laaste dag van die skoolvakansie ’n bietjie tranerig, kon die sesjarige Keaton nie wag om vir die eerste keer skool toe te gaan nie. ‘‘Hy’s vreeslik opgewonde. Maar dis vir my oorweldigend om te dink hy begin vanjaar met sy formele skoolopleiding – dit voel asof hy nou grootword en klaar die huis verlaat,’’ sê die voormalige Mej. Suid-Afrika. Haar eersteling is vanjaar in gr. R aan die Laerskool Bryandale in Bryanston.

Ons het die glansma Michelle McLean en haar negejarige seun Luke in Claremont, Kaapstad, raakgeloop waar hulle skryfbehoeftes vir die skooljaar gaan koop het. En die mannetjie kon nie wag om terug te keer na die skoolbanke nie. ‘‘Ek gaan beslis rugby speel,’’ het hy skaam gesê. Luke begin vanjaar by ’n nuwe skool, vertel sy ma. ‘‘Hy is nou in gr. 4 by SACS in Nuweland waar ons woon.’’

Die Mr Bones 2-aktrise Leeanda Reddy se huis was in rep en roer op die vooraand van die nuwe skooljaar toe haar sesjarige seun, Yorke, alles vir sy eerste skooldag reggekry het. ‘‘Hy het tot laat wakker gebly om sy naam op al sy goed te skryf.’’ Hy is vanjaar ’n graad-eentjie by Reddam House in Bedfordview, en hy het eers ’n bietjie benoud begin voel toe Ma hom by sy klas groet. Maar Leeanda was nog meer aangedaan as hy. ‘‘Ek dink die eerste skooldag is selfs meer spannend vir die ouers,’’ sê sy.

Zane Meas se kroos het behoorlik geskarrel toe die laaste aand van die skoolvakansie aanbreek. ‘‘Hulle was tot laataand besig om hul boeke oor te trek en hul skoene skoon te maak,’’ vertel 7de Laan se Neville. Campbell is vanjaar in gr. 10 by The Kings School West Rand in Ruimsig aan die Wesrand en Connor is in gr. 7.

Patricia Lewis kan dit net nie oor haar hart kry om Max se blonde lokke te knip nie. Gelukkig mag die vierjarige knapie met hare en al na sy speelgroep in Ballito, KwaZulu-Natal, gaan. ‘‘Hy’s mal daaroor om met die ander kinders te speel,’’ vertel die sangeres.

Darren Scott se eie paradys

Net ’n klipgooi van die Magaliesberge en ’n minuut se ry van die skilderagtige Hartbeespoortdam staan ’n dubbelverdieping-grasdakhuis. Sebras en wildsbokke dwaal buite rond en twee boerbokke blêr rustig aan die onderpunt van die tuin.

‘‘Dis my paradys,’’ sê Darren Scott, wat sedert 2002 hier woon. ‘‘Ek wou van kleins af in die bos bly.’’

Die vredigheid hier by die vierslaapkamerhuis is in skrille kontras met die gewone gejaagde lewenstyl van die 45-jarige radio-en-televisiepersoonlikheid. Wanneer die meeste van ons nog slaap, is hy al uit die vere, en hy kom eers sononder weer hier by die huis wat hy met sy verloofde, die model, aspirant-aktrise en onlangse Mej. SA-finalis Sarah-Kate Seaward (25) deel.

Hy slaan ’n koppie koffie weg voor hy koers kry na Jacaranda 94.2 se ateljee in Midrand. Daar bied hy die afgelope twee jaar die program Just Plain Breakfast aan. In die namiddag is hy die aanbieder van die Just Plain Show vir die Durbanse stasie East Coast Radio. Dan werk hy ook nog twee keer per week as vryskutaanbieder by M-Net se SuperSport.

‘‘Ek is ’n werkslaaf,’’ bely hy. ‘‘Gister het ek tot twee-uur die oggend op kantoor aan ’n voorstel gewerk.’’

Maar dit gaan nie ongesiens verby nie: Hy is onlangs by die Suid-Afrikaanse Radio-toekenningsaand as die platejoggie van die jaar en sy ontbytprogram as die mees innoverende program van die jaar aangewys.

‘‘Dit was ’n eer,’’ sê hy. ‘‘Ek het op my dek in Harties gesit toe my programbestuurder my bel om te sê ons het gewen. Hy was daar – ek is nie genooi nie. Ek het glad vergeet die prysuitdeling is daardie naweek.’’

Dan lag hy. ‘‘Ek hoor daar was ook internasionale beoordelaars op die paneel. Dit verklaar waarskynlik waarom ek goeie punte gekry het – hulle kon nie my Afrikaans verstaan nie. Nie eens Afrikaanse mense kan my Afrikaans verstaan nie!’’

Darren pendel elke dag minstens twee uur lank werk toe en terug, maar dis ’n klein opoffering vir die voorreg om in sy droomhuis te woon, sê hy.

In Huisgenoot van 22 Januarie wys Darren Scott van radio en TV sy paradys.

Sandy van Strictly is dolverlief

Die meisie van Strictly is dolverlief. Sandy Ngema se gesig helder skoon op terwyl sy kyk hoe die man in haar lewe bokse insleep by die tuinhuisie wat hy op die erf van hul deftige blyplek in Ferndale, Randburg, gebou het.

‘‘Nunu, kom help hier,’’ roep Peter Ehrenreich haar op haar troetelnaam. Sandy rol net haar oë en skerts: ‘‘Hierdie wit mense en hul ou goed.’’ Dan vat sy tog een van die 55 bokse vol van haar Deense geliefde se goed wat buite die garage opgestapel is en dra dit by die pakkamer in.

Voorverlede jaar het Sandy, wat toe pas van Sandile Ngema geskei is, ’n gerieflike lewe as enkelma in voorstedelike Johannesburg gelei. In Mei is sy vir sake Durban toe vir haar onderneming, C & R Umnombo, ’n vervaardiger van korporatiewe geskenke.

‘‘Ek en Peter het gelyk by die hotel uitgeteken en is saam aangery lughawe toe,’’ vertel sy. Soos die noodlot dit wou hê, het hulle langs mekaar op die vlug beland.

Peter onthou sy het bekend gelyk. ‘‘Ons het heelpad terug Johannesburg toe gesels, maar ek het nooit na Strictly Come Dancing gekyk nie en kon haar nie plaas nie. Ons het sakekaartjies uitgeruil en ’n lang ruk net
e-posse heen en weer gestuur.’’

Daar was ’n vonk, maar Peter het toe in Singapoer gebly waar hy Safmarine se Asiatiese belange bestuur het. Hy het wel gereeld vir sake Suid-Afrika toe gekom en dit was op een so ’n besoek dat hy vir Sandy vertel het hoe hy voel.

’n Jaar lank het hulle in luukse oorde in Asië gelag en gestry en uitgespan, en vroeg verlede jaar het die twee begin praat oor saam intrek.

Peter sê die besluit om terug te trek na Suid-Afrika, kom al ’n lang pad. ‘‘Ek was van 1999 tot 2003 die besturende direkteur van Maersk in Suid-Afrika en ek het op die land verlief geraak.”

Ná 24 jaar by die Maersk-Safmarine-groep het hy toe bedank en sak en pak na Suid-Afrika teruggetrek. Hy het sy eie verskepingsonderneming, Mareco Logistics, begin en by Sandy se spoghuis ingetrek.

Lees meer oor Sandy en haar Deense geliefde in Huisgenoot van 22 Januarie.

Oud-Bok Theuns nog vol moed

Toe die pyne in sy bene begin, het hy gedink dis maar die ou rugbybeserings wat hom nou hier in sy vyftigerjare laat les opsê. Op sy dag het Theuns Stofberg immers meer as sy deel aan stampe en stote op die rugbyveld beleef.

Maar toe die gewese Springbok-kaptein in November op pad Londen toe vir ’n toets tussen Suid-Afrika en Engeland skielik sulke ondraaglike pyn beleef dat sy vrou gedink het hy gaan sterf, het hy besef hier is groot fout.

In Londen aangekom, het hy nog dapper op sy tande gebyt. Maar teen middernag was die pyn so onuithoudbaar dat sy familie met hom hospitaal toe gejaag het.

Die volgende dag kom die diagnose: Hy ly aan die seldsame Churg-Strauss-sindroom. Theuns (53) is self ’n fisioterapeut, maar het nog nooit daarvan gehoor nie, en die dokters moes verduidelik dis ’n toestand wat ontsteking van die slagare veroorsaak en ernstige orgaanskade tot gevolg kan hê.

Hy was ’n week in die hospitaal en kon toe darem daarna op televisie na die toets kyk. Maar terug in Suid-Afrika was hy verplig om sy praktyk op Stellenbosch te sluit.

‘‘Ek moes maar,’’ sê Theuns in sy huis buite die dorp. ‘‘Ek kan nie in my toestand met mense werk wat self hulp nodig het nie. Ek kan ook nie so lank op my bene staan nie. Die gevoel is weg en ek het geen reflekse of balans nie en ek dra ’n voetstut.’’

Die geluk by die ongeluk is dat die situasie veel erger kon gewees het. In sommige gevalle tas die siekte pasiënte se organe en selfs breinfunksie aan. Daar is reeds getoets of Theuns se lewer, niere, hart en longe aangetas is, maar alles is gelukkig in orde.

En noudat Theuns goed op sy medikasie reageer, het hy selfs ’n nuwe stokperdjie.

‘‘Ek was onlangs met vakansie in Stilbaai en het saam met ’n vriend in sy dubbelkano gaan vaar. Toe besef ek ek het nie my bene nodig om te roei nie.

‘‘As ek ’n borg kan kry,’’ spot hy, ‘‘neem ek dalk nog deel aan die Bergrivier-marathon!’’

Lees in Huisgenoot van 22 Januarie meer oor Theuns en die seldsame outo-immuun-siekte Churg-Strauss-sindroom.

Skouspel: Wikkel vir die laaste kaartjies!

Hier is die beste nuus van die nuwe jaar: As jy dalk gedink het jy gaan Skouspel se tiende verjaardag misloop, moenie bekommerd wees nie, daar is nog beperkte plek beskikbaar – naweekpakkette of net kaartjies as jy self daarheen wil ry.

Wat ’n unieke ervaring om soveel van ons topkunstenaars op een verhoog te sien optree. Met uitmuntende kunstenaars soos Kurt Darren, Juanita du Plessis, Laurika Rauch, Nicholis Louw en Chris Chameleon, om maar net ’n paar te noem, sal selfs ’n petrolprys van R1 per liter jou nie so meevoer nie!

Maar om die fees nog lekkerder te maak, het ons ook weer die luukse Bloutrein nader gehark om op 3 Oktober die blink spoor uit Gauteng na Sun City te vat.

So ry die Bloutrein . . . vanaf R4 350 per persoon

Ervaar in die eerste Skouspel-naweek van 3 Oktober persoonlik die stralerjakkerlewe met luuksheid uit die boonste rakke aan boord van die Bloutrein.

Reisprogram: Vertrek op 3 Oktober om negeuur van Pretoria-stasie. Die terugrit om tienuur die volgende dag begin met ’n heerlike ontbyt aan boord.

Ingesluit by die prys: Een nag se verblyf in ’n kompartement met en suite-geriewe aan boord, etes volgens die program, alle drankies aan boord (uitgesluit Franse sjampanje en ingevoerde drankies), toegang tot Sun City en jou Skouspelkaartjie.

Uitgesluit by die prys: Toegang tot die Valley of the Waves (R70 per persoon) en enige etes/drankies in Sun City.

Gaan na www.bluetrain.co.za vir nog inligting.

Skouspelvertonings

Saterdag 3 Oktober middagvertoning 14:00, aandvertoning 20:00
Sondag 4 Oktober middagvertoning 12:00
Saterdag 10 Oktober middagvertoning 13:00, aandvertoning 19:00
Sondag 11 Oktober middagvertoning 12:00

Skouspelkaartjies
As jy net Skouspelkaartjies wil koop, gaan na jou naaste Computicket-tak, bel 083-915-8000 of gaan na www.computicket.co.za. Onthou, ons reisklub verkoop
nie die kaartjies nie, dis net by Computicket beskikbaar.

Skouspel-naweekpakkette
Vir nog inligting en besprekingsvorms gaan na www.megatrav.co.za of stuur ’n e-pos aan skouspel@megatrav.co.za. As jy nie internettoegang het nie, kan jy 011-886-9545 bel of ’n faks na 086-504-3133 stuur.

Minki die besige bytjie

Net ’n rapsie meer as ’n jaar gelede het sy mev. Visser geword, en sedertdien ook die glansgesig van Mumm-sjampanje en van die haarkleursel-mense Garnier Nutrisse. Dan reis die 24-jarige model met die rietskraal lyfie ook nog die land plat vir die joernaalprogram Pasella. Omtrent ’n bedrywige bytjie.

Maar moenie dink sy is te besig vir haar ‘‘liefie’’ nie. No-o-o-it! verseker sy jou gou. En kyk jy so na Minki en haar sakeman-manlief Constant hier in die gesellige sitkamer van hul huis in Stellenbosch waar Toulouse die kat en Kaizer die hond ook woon, loop die liefde nog sterk.

Hy het al baie lekker dinge gedoen, sê Constant (38), ‘‘maar om met haar te trou was vir seker die heel beste en lekkerste tot nog toe’’. En hy druk die meisie wat hy ewe liefies Muis noem, styf teen hom vas.

Constant was lank alleenloper en hy erken self hy was sommer ‘‘plein en simpel vol dinges’’ oor die vroukiesery. Tog is hy vandag bitter bly hy was so
uitsoekerig. ‘‘Anders het ons dalk nooit by mekaar uitgekom nie. Maar sy is beslis die regte antie,’’ skerts die vriendelike man wat ’n eetplek in Stellenbosch het. En hy knipoog vir sy vrou.

Sy is ewe seker van haar saak. ‘‘Hoewel ek nogal jammer voel vir almal wat hom so graag wou hê, sal ek hom beslis nooit weer laat gaan nie,’’ sê Minki met ’n breë glimlag.

En aikôna, dis darem nie net ’n mooi gesiggie dié nie – Minki kook graag en spog dat nie een van haar resepte nog skeefgeloop het nie. Sy ‘‘love dit’’ as die kosgeure in die lug hang wanneer Constant saans daar instap – veral as sy hom verras met sy gunsteling-gereg: ontbeende hoenderdye met brandrissie en paprika en koeskoes of slaai.

Die kombuis lyk hoeka heel knus, en tipies Minki is daar altyd iewers ’n tikkie romanse te bespeur. Vandag is dit die rooi rose in ’n vaas op die kombuis-toonbank en kandelare met kerse oral waar jy kyk. ‘‘Ek brand selfs kerse wanneer ek alleen is,’’ sê sy.

Lees meer oor Minki en Constant en kyk na hul huis in Huisgenoot van 15 Januarie.

Romanse in die reën

Nie eens die donker wolke wat bo hulle saamgepak het, kon die bruidspaar se dag bederf toe die rugbyspeler Heinke van der Merwe kort voor Kersfees sy toks en rugbytrui vir ’n troupak verruil het nie.

Die Leeus se slot is tydens ’n swierige seremonie met Nicole Basson, ’n veearts-assistent, by die Zebra Country Lodge buite Pretoria getroud. ‘‘Reënweer is seënweer!’’ het sy blymoedig uitgeroep toe die reën in vlae begin neersak.

Die galante Heinke het dadelik ’n sambreel gegryp om sy bruid daarteen te beskerm. Maar hy kon self nie die nattigheid van ’n traan keer toe hy voor die kansel aan haar trou beloof nie.

Nicole het die geskenke vir die gaste, handgemaakte glasmatjies, self met mosaïekpatrone versier. ‘‘Ek het ’n paar vingernaels in die proses verloor; daarom moet mense dit maar gebruik!’’ het sy geskerts.

Haar droom van ’n wittebrood in die Bosveld is bewaarheid toe Heinke haar na die Shiduli-wildreservaat in Limpopo weggevoer het vir ’n romantiese vakansie.

Snerpende seisoengroete

As die kwik bedags skaars 8 grade benede vriespunt haal, vier jy Nuwejaar anders as in sonnige Suid-Afrika.

Die sangeres en voormalige Pasella-aanbieder Charlene Truter moes haar dié vakansie omtrent soos ’n Eskimo vermom, nadat sy kort voor Kersfees sak en pak Duitsland toe getrek het om daar by haar man, Thomas Morick, in die stad Bielefeld aan te sluit.

‘‘In die mode wees kom tweede as dit minus 8 grade C is!’’ sê sy. ‘‘Ek en Thomas was al tevore Kersfees saam, maar hierdie keer was dit spesiaal, want al my besittings het saamgekom.’’

Sy gaan dikwels in Suid-Afrika kom kuier, maar ondersoek ook werkmoontlikhede in haar aanneemland.

‘‘Ek leer nou hoe om in die sneeu aan die regterkant van die pad te bestuur, ek leer ski en maak vrede met Facebook, want dis die maklikste manier om kontak met vriende by die huis te behou.’’

Seenimf

Sy’s glad nie lief vir op die strand lê nie, maar dit het Catriona Andrew nie gekeer om die afgelope vakansie by die see te gaan uitspan nie.

‘‘Ek sal eerder heeldag in die branders op my waterponie wees,’’ vertel die aktrise. ‘‘Ek kuier elke jaar vir ’n week of twee by vriende en familie in St. Francisbaai, en was vanjaar ook op Waenhuiskrans. Die weer was heerlik in St. Francisbaai, maar by Waenhuiskrans was dit heeltyd stormweer.’’

Sy is later vanjaar op die kassie te sien in die tweede seisoen van die SABC2-dramareeks Erfsondes, en vanaf Maart verskyn sy ook op die silwerdoek in die plaaslike fliek Finding Lenny.

‘‘Vir ’n verandering speel ek ’n romantiese karakter, nie die nare booswig van wie niemand hou nie!’’

Vakansieverlowing

Daar bring Kersvader toe vir Shine 4 se Desiree Underwood ’n reuse present!

Terwyl die sangeres kort voor Kersfees in Mosselbaai vir die groep se laaste optrede regmaak, is ’n kaartjie by haar aanttrekkamer afgelewer. Daarop het gestaan: ‘‘Dis die einde van ’n siklus vir jou, en hopelik die begin van ’n nuwe een. Sal jy met my trou?’’

‘‘Die ander meisies van Shine 4 sê toe ek moet na kamer veertien in die hotel gaan, en daar wag my kêrel my met sjampanje in. Hy’t my kom verras!’’ vertel Desiree.

Sy en Doug Bain gaan later vanjaar in Knysna trou, en sy wil ook die kindermusiekmark betree.