Eksklusief: Lucas praat oor sy kanker

Hier in hul huis in Bloemfontein sit Lucas Maree tussen sy “meisies” en dit is ’n gespot, ’n gegiggel en ’n geskud soos daar uit die maag gelag word.

Eers gaan dit oor die dik, groen strepe in sy middelste dogter, Linda (22), se hare.

“As jy so lank soos ek in ’n huis vol vroumense bly, leer jy om nie kommentaar te lewer nie,” sê die bekende Afrikaanse sanger. “Jy bly eerder doodstil en smile en knik maar net.”

Maar, reken sy drie spruite, hy wat pa Lucas is, moenie te vinnig praat nie. Want as hulle nie kyk nie, gaps hy hul rekkies vir sy eie geil boskasie.

Maar te midde van al die ge-skerts lê ’n somber feit onuitgesproke tussen hulle: prostaatkanker. Tog sal die 57-jarige sanger wat die woorde “ek kan doen met ’n miljoen” met sy eerste CD beroemd gemaak het, nie gaan lê nie.

Die lagbuie verjaag die depressie wat soms vir hom grom en blaf, sê hy.

“En ek doen oumenskarate.” Hy demonstreer op die plek ’n paar tai chi-bewegings op die grasperk.

Sy oudste, Monica (26), ook ’n sanger in sy groep, Lucas En Kie, vertel hoe haar pa op pad terug van vanjaar se Klein Karoo Nasionale Kunstefees amper groot konsternasie veroorsaak het. Hulle het langs die pad stilgehou en Lucas het sommer net daar tai chi begin doen.

“ ’n Motoris wat gedink het sy grasieuse armbewegings is ’n hulproep het met skreeuende bande stilgehou,” vertel sy laggend. Die man het amper sy kar omgegooi. Die klompie het eers groot geskrik en toe uitgebars van die lag. Hulle het hom verseker dis geen noodgeval nie – net Lucas wat besig was om innerlike vrede te vind.

Prostaatkanker is sowat ’n jaar gelede by hom gediagnoseer. Wat begin het as ’n gesukkel om te urineer het op ’n operasie uitgeloop en die meeste van sy prostaat is verwyder.

Hy het hom yskoud geskrik toe hy die k-woord hoor en was vies vir homself omdat hy nie jaarlikse prostaatondersoeke laat doen het nie.

Lees die res van die onderhoud en ook wat prostaatkanker is in Huisgenoot van 5 November.

Diederik kan nie wag vir sy kleinding

’n Mens sou sweer dis eintlik hý wat verwagtend is. . . Hy eet twee keer meer as gewoonlik, sy hormone is op hol, hy raak vinniger geïrriteerd as voorheen en hy kan nie verby pienk babakleertjies stap sonder om eers vas te haak nie.

Want Hennie Jacobs (28), oftewel 7de Laan se Diederik, is so opgewonde oor die koms van sy kleinding, hy deel sommer sy vrou se swangerskapsimptome. “Hy’s erger as ek! Hy kan homself nie keer nie; hy’t vanoggend al weer ’n klomp borslappies gekoop,” lag Marissa Vosloo-Jacobs (33) terwyl sy oor haar boepie streel.

Die twee loer liefdevol vir mekaar en Hennie neem Marissa se hand met ’n ingenome glimlag in syne. Hy is so trots, jy kan sommer sien hoe sy bors swel wanneer hy oor sy dogtertjie praat. Dié word vroeg in Februarie gebore en is nou amper 27 sentimeter lank, vertel hy grootoog.

“Ek dink al klaar aan haar as my dogtertjie; sy’s reeds ’n klein mensie,” sê die akteur wat in Desember verlede jaar getroud is met die borrelende Marissa, ’n tegniese skrywer by ’n internasionale inligtingstegnologie-maatskappy.

Hulle het nie beplan om die ooievaar so vinnig ná hul troue na hul huis te nooi nie, maar toe hulle in Junie vanjaar uitvind “daar is ’n klein verrassing op pad”, was hulle in die wolke. Hennie het sommer dadelik besluit hulle moet na ’n groter huis trek sodat hulle die kleintjie se kamer solank kan regmaak, en hulle het binne ’n week na ’n nuwe drieslaapkamerhuis in Broad Acres, Johannesburg, getrek.

“Hennie is baie prakties; hy’t dadelik besef ons kan nie meer soos tevore in ’n dubbelverdiepinghuis bly nie omdat die trap gevaarlik vir ons kind gaan wees. Toe soek ons sommer dadelik ’n enkelverdiepinghuis!” vertel Marissa, wat nou ses maande swanger is.

Lees oor Hennie en Marissa se voorbereidings vir hul baba in Huisgenoot van 5 November.

Musiekfabriek se Riaan vat vrou

Met ’n triomfantelike vuis in die lug stap hy by die skemer kerkgebou uit, tot op die kliptrappies wat in die helder Vrystaatse son baai. Sy bruid is stralend aan sy sy.

Die gaste voor die NG Moederkerk bars los met ’n spontane gejuig terwyl roosblare op die pasgetroude paartjie reën, want hier aan die voet van die Platberg in Harrismith in die Noordoos-Vrystaat het die perkussieman met die groot hande pas vir hom ’n vrou gevat.

Suid-Afrikaners ken Riaan van Rensburg (33) as die perkussiespeler van die Musiekfabriek in die TV-reeks Noot vir Noot en seun van die sanger Rina Hugo en die klavierspeler Johan van Rensburg. Maar sy het verlief geraak op die mens binne hom, vertel sy bruid, die plaasmeisie van Harrismith, Christien van der Westhuyzen (33).

En hy het ’n weddenskap verloor, vertel Riaan op sy beurt. Want hy het voor hul troudag belowe hy sou nié tydens die kerkdiens huil nie.

‘‘Maar toe Christien in die paadjie afstap en ek luister na die troumars en ek kyk na haar . . . wel – daardie weddenskap het ek net daar verloor.’’

Dié troumars was vir Riaan des te meer besonders, want die baie spesiale meisie aan sy sy het dit self gekomponeer en hy het die verwerkings gedoen.

Terwyl die gaste buite die kerk beurte maak om die paartjie geluk te wens, gons dit oor die kerkdiens. Johan van Rensburg se klavierspel was een van die vele hoogtepunte, is die gevoel.

‘‘Toe my pa speel, kon ek nie vir hom kyk nie,’’ bieg Riaan. ‘‘Ek was net te emosioneel. Ek moes maar met my ore kyk.’’

Ook ds. Richi Kemp se boodskap het die bruilofspaartjie diep geraak. God het reeds voor die grondlegging van die wêreld beskik dat Riaan en Christien op dié dag by mekaar sal uitkom, het hy gesê.

Toe is die gelukwensinge verby en Riaan en Christien klim in ’n swart 1923-Model T Ford, wuif vir die gaste en vertrek na die La La Nathi-onthaalsaal buite die dorp. Daar staan die tafels gedek, gereed vir ’n groot partytjie.

Lees meer oor die troue in Huisgenoot van 5 November.

Burton Francis mik hoog

Hy is die een wat Morné Steyn se skoene moet vol staan elke keer wanneer die skopkoning vir die Springbokke gaan speel. En ons weet almal dis gróót skoene.

Maar wanneer Burton Francis die geleentheid kry, staan hy stewig in daardie tokse. Hiervan getuig die 53 punte wat die Bulle se plaasvervanger-losskakel al die afgelope seisoen met sy skopskoen opgestapel het.

G’n wonder nie sportskrywers reken hy is ’n Bok van die toekoms en moet voorberei word om vir die Springbokke te doen wat hy nou met soveel sukses vir die Bulle doen – om as losskakel uit te draf as beserings Morné dalk die dag van die veld af hou. Daarby reken hulle hy het die taktiese vaardighede wat die spel op internasionale vlak nodig het. Duidelik word groot dinge van hierdie jong speler verwag.

Op 22 het Burton al diep spore op Loftus se veld getrap en daar is selfs mense wat sê hy kan eendag die paadjie stap van vorige Loftus-lieflinge op losskakel soos Naas Botha, Derick Hougaard en Morné Steyn.

Hy bring al van 2006 af sy kant, toe hy vir die Bulle in die Absa-o.19-reeks gespeel en hulle die beker huis toe gebring het. ’n Jaar later, toe op heelagter, het hy die o.21-Bulle gehelp om die naaswenners te word. Die volgende jaar is Burton vir die Vodacombekerspan gekies en weer was sy span die wenners. Vanjaar het sy spelvernuf die Bulle se Super14-keurders so beïndruk dat hy die dag ná die Vodacom-eindstryd sy debuut teen die Brumbies gemaak het.

Jaar ná jaar het Burton se skopskoen ’n reuse rol gespeel in sy span se sukses. Hy het gewys hy is nie net ’n goeie spanspeler nie, maar blink ook individueel uit. Daarom was hy verlede jaar Vodacom se speler van die jaar.

En dit was toe onafwendbaar: Die keurders van die Bulle se topspanne kon hom nie meer miskyk nie. Hy was skielik ’n gereelde gesig in die Curriebekerspan en vanjaar ook lid van die Super14-Bulle.

Maar ongelukkig het Burton meestal in die skadu van Morné Steyn gestaan en die meeste van die wedstryde op die reserwebank begin. En hoewel hy weet hoe belangrik sy rol as plaasvervanger was in die Bulle se oorwinning in die Super14 en hul sukses in die Curriebeker, is hy nou klaar tweede viool gespeel.

Lees meer oor Burton se geskiedenis en toekomsideale in Huisgenoot van 5 November.

Burton Francis mik hoog

Hy is die een wat Morné Steyn se skoene moet vol staan elke keer wanneer die skopkoning vir die Springbokke gaan speel. En ons weet almal dis gróót skoene.

Maar wanneer Burton Francis die geleentheid kry, staan hy stewig in daardie tokse. Hiervan getuig die 53 punte wat die Bulle se plaasvervanger-losskakel al die afgelope seisoen met sy skopskoen opgestapel het.

G’n wonder nie sportskrywers reken hy is ’n Bok van die toekoms en moet voorberei word om vir die Springbokke te doen wat hy nou met soveel sukses vir die Bulle doen – om as losskakel uit te draf as beserings Morné dalk die dag van die veld af hou. Daarby reken hulle hy het die taktiese vaardighede wat die spel op internasionale vlak nodig het. Duidelik word groot dinge van hierdie jong speler verwag.

Op 22 het Burton al diep spore op Loftus se veld getrap en daar is selfs mense wat sê hy kan eendag die paadjie stap van vorige Loftus-lieflinge op losskakel soos Naas Botha, Derick Hougaard en Morné Steyn.

Hy bring al van 2006 af sy kant, toe hy vir die Bulle in die Absa-o.19-reeks gespeel en hulle die beker huis toe gebring het. ’n Jaar later, toe op heelagter, het hy die o.21-Bulle gehelp om die naaswenners te word. Die volgende jaar is Burton vir die Vodacombekerspan gekies en weer was sy span die wenners. Vanjaar het sy spelvernuf die Bulle se Super14-keurders so beïndruk dat hy die dag ná die Vodacom-eindstryd sy debuut teen die Brumbies gemaak het.

Jaar ná jaar het Burton se skopskoen ’n reuse rol gespeel in sy span se sukses. Hy het gewys hy is nie net ’n goeie spanspeler nie, maar blink ook individueel uit. Daarom was hy verlede jaar Vodacom se speler van die jaar.

En dit was toe onafwendbaar: Die keurders van die Bulle se topspanne kon hom nie meer miskyk nie. Hy was skielik ’n gereelde gesig in die Curriebekerspan en vanjaar ook lid van die Super14-Bulle.

Maar ongelukkig het Burton meestal in die skadu van Morné Steyn gestaan en die meeste van die wedstryde op die reserwebank begin. En hoewel hy weet hoe belangrik sy rol as plaasvervanger was in die Bulle se oorwinning in die Super14 en hul sukses in die Curriebeker, is hy nou klaar tweede viool gespeel.

Lees meer oor Burton se geskiedenis en toekomsideale in Huisgenoot van 5 November.

Darren Scott skud die kilo’s af

Ons herken Darren Scott skaars, want die SuperSport-aanbieder en platejoggie van Jacaranda FM is nie meer die stewige kêrel van vroeër nie. Hy is nou ’n volle 38 kg ligter as net sewe maande gelede en hy lyk gesonder as ooit tevore.

Maar Darren is nog dieselfde platjie wat jou eers met ’n uitdrukkinglose gesig vertel sy dramatiese gewigsverlies is danksy ’n operasie waarin sy maag gekram en sy dikderm verkort is. Dan glimlag hy ondeund en laat die aap uit die mou: Dis alles danksy leefstylveranderinge.

‘‘Ek het my hele dieet verander,’’ sê hy en teug aan ’n koppie swart koffie sonder suiker. ‘‘Ek voel fantasties en het meer energie as tevore.’’

Hy drink nie meer 10 koppies koffie per dag nie, net vier. Dis een van sy min oorblywende sondes, saam met die rookgewoonte. En hy drink baie minder drankies, al het hy steeds sy kosbare Jack Daniels-versameling. Die gebraaide en vetterige kosse en bruisdrankies soos Red Bull los hy nou vir ander.

‘‘Daar is geen gemorskos meer in my lewe nie,’’ sê die 45-jarige radio-aanbieder van die ontbytprogram Just Plain Breakfast wat pas met ’n Suid-Afrikaanse Radio-prys vir die innoverendste program bekroon is.

‘‘Ek bring baie tyd in ateljees en radiohokkies deur en dit is baie maklik om in die slagyster te trap en sommer gou ’n hamburger en skyfies te bestel.’’

Maar nie meer nie.

‘‘Dit is die nuwe Darren dié,’’ sê hy vol selfvertroue. “Dis die Darren van die toekoms.’’

Lees meer oor Darren se ommekeer in Huisgenoot van 5 November.

Bokheld Morné se troue

Sy oë is veral opvallend – helder, groen, intens.

Ons sien hulle gewoonlik vol ysere vasberadenheid wanneer hy pale toe mik, maar vandag blink hulle van opgewondenheid. Waar hy onder ’n gazebo op sy bruid wag, trap Morné Steyn senuagtig van die een voet na die ander.

In die amfiteater by die Valley of Waves in Sun City is baie van die Blou Bul- en Bok-losskakel se rugbyvriende byeen. Onder hulle is Ruan Pienaar, Pierre Spies, Fourie du Preez, Bakkies Botha, Bryan Habana, Akona Ndungane, Burton Francis, Wynand Olivier, Zane Kirchner en Dewald Potgieter.

Een van die strooijonkers is Johann van Graan, die Bulle se voorspeler-afrigter.

Maar op die oomblik stel Morné (25) net in een mens belang: sy toekomstige vrou, Christelle van Zyl (23). Die vrou op wie hy 10 jaar gelede op hoërskool verlief geraak het, en die een saam met wie hy die res van sy lewe wil deurbring.

Die troue vind op ’n Dinsdag plaas. Dit is dalk ongewoon, maar as rugby jou naweke in beslag neem, moet jy sulke dinge in die week inpas. Veral as jou span oor net meer as ’n week in die Curriebeker-eindstryd speel.

Die gaste gons opgewonde toe ’n perdekar in die styl van Aspoestertjie se koets buite die amfiteater stilhou en die bruid daar uitklim asof uit ’n sprokiesverhaal. Christelle stryk haar pragtige rok glad, verstel haar kort sluier en neem haar pa, Gilleam, aan die arm.

Terwyl sy wag om in die paadjie af te stap, luister die gaste na ’n boodskap wat sy vroeër opgeneem het: ‘‘Dit is my grootste droom wat bewaarheid is. Ons liefde sal elke dag aanhou groei en ons nuwe gesin sal in gees, liggaam en siel geseënd wees. Vandag en vir altyd wil ek die ideale vrou wees wat Morné verdien. Ek sal hom liefhê tot die dood ons skei.’’

Lees meer oor Morné se troue en sien pragfoto’s daarvan in Huisgenoot van 29 Oktober.

Nuwe Joost-boek verklap dalk geheime

Hier kom dit oplaas – die boek wat glo uiteindelik die sluier voor die waarheid oor die hele Joost-sage gaan wegruk.

Spieëlbeeld, ’n opspraakwekkende biografie oor die oud-Springbok-rugbykaptein Joost van der Westhuizen, tref die winkelrakke binne dae. En advertensies wat al vir die boek verskyn het, belowe “dit bring die waarheid agter die aantygings en teenaantygings wat Joost tans omring, aan die lig”.

Die boek kom te midde van toenemende fluisteringe dat die sogenaamde seksvideo-skandaal waarin Joost vroeër vanjaar betrokke was, sy huwelik tot op ’n mespunt gedryf het. Dit gaan glad nie goed in die Van der Westhuizen-huishouding nie, sê bronne.

Sal die boek onthul dat sy vrou, die sanger Amor Vittone – soos ons ook betroubaar verneem het – nou self oortuig is dis haar man in die berugte seksvideo wat in Februarie sy lewe omver kom gooi het?

G’n wonder Amor het onlangs op ’n onverwagse manier gereageer toe ’n kyker in ’n regstreekse uitsending van die kykNET-program Jukebox ingebel en vertel het hoe gelukkig getroud sy is nie. Amor se woorde was: “Geniet mekaar, en waardeer mekaar, want dit kan baie vinnig, sommer in ’n oogwink, verander . . .”

Maar eindelik is daar net een vraag op almal se lippe: Gaan die Bok-held in die biografie bieg dat dit wel hy was wat voor ’n versteekte kamera met die ontkleedanseres Marilize van Emmenis gekafoefel het?

In Maart het David Gemmell, skrywer van die boek en ’n joernalis wat gereeld vir die koerant The Weekender oor sportlui skryf, Joost in ’n onderhoud gevra of dit hy in die video is. Die antwoord het baie vinnig gekom: “Nee.”

Gaan hy dalk nou ’n ander deuntjie sing? Gaan hy bieg dat dit wel hy is, of dalk oor sy vermeende buite-egtelike verhoudings met ander vroue? ’n Bekende sportvrou het vroeër vanjaar bely sy het ’n buite-egtelike verhouding met hom gehad, en sy weet ook van ander vroue by wie hy geslaap het (‘‘Minnares praat: ‘Joost hét Amor verkul’, 19 Maart).

Lees meer oor Joost en Amor se wankelende huwelik in Huisgenoot van 29 Oktober.

Rob Louw veg teen kanker

Goue seun van Suid-Afrikaanse rugby het hy die Bulle, die All Blacks en menige ander gedugte spanne ore aangesit – hoe sal hy dan nou toelaat dat kanker hom onderkry?

Dié boodskap van die oud-Springbok-rugbykaptein Francois Pienaar aan Rob Louw, ons flink flank van die tagtigs, is maar een van duisende wat van oral in die wêreld ingestroom het nadat metastatiese melanoom by hom gediagnoseer is.

Dit is ’n potensieel dodelike soort velkanker – en kon dalk reeds na sy limfkliere en inwendige organe versprei het.

Dit is ’n baie aggressiewe kanker wat meestal nie suksesvol met chemoterapie behandel kan word nie.

Medies gesproke lyk dinge nie goed nie, maar die Louws is nie mense wat hulle laat onderkry nie. Hulle het gespring om inligting te kry, met dokters en vriende beraadslaag en twee dae nadat die siekte gediagnoseer is, was Rob en sy vrou, Azille, op ’n vliegtuig na Amerika.

Sy ou studentevriend Johann Rupert het hom dadelik bygestaan sodat hy by Amerika se topkankerhospitaal, die wêreldbekende M.D. Anderson-kankersentrum in Houston, die beste moontlike behandeling kan kry.

By hul huis in Durbanville is Rob se dogter Roxy (22) – self ’n uitblinker in branderplankry en hokkie asook ’n internasionale model – baie besorg oor haar pa, maar tog ook ongelooflik positief.

‘‘Ek het pas met my ma oor die telefoon gepraat. Skanderings is gedoen en die behandeling moet nog begin,’’ het Roxy gesê terwyl sy haar tasse pak om by hulle te wees.

Rob se ander drie spruite, Misty (20), Shaahnee (19) en Robbie (17), hou die fort tuis, maar hulle is almal geïnspireer deur die positiewe boodskappe wat steeds instroom.

Veral die boodskap van bemoediging van die Amerikaanse fietslegende Lance Armstrong beteken vir hulle baie. Hy het in 1996 teen alle verwagtinge in testikulêre kanker oorwin nadat dit reeds na sy longe, buik en brein versprei het.

Lees meer oor Rob se siekte in Huisgenoot van 29 Oktober.

Einde van die pad vir Santana

Hy het ’n groot neus, ’n vlesige gesig vol akneeletsels en ’n frons wat jou aan ’n bulhond laat dink. Maar Joel Santana is nie hier om ’n skoonheidskompetisie te wen nie; hy is hier om ons nasionale span te red. En hy gaan dit op sy manier doen – met baie emosie, streng dissipline en ’n milde skeut liefde.

So het ons verlede jaar geskryf kort nadat die 60-jarige Brasilianer aangestel is (Maak nou vir Pappa trots!, 5 Junie 2008). Destyds was min bekend oor Joel, behalwe dat hy nog nooit ’n nasionale span afgerig het nie, ’n bietjie sukses op klubvlak behaal het en ’n paar van sy eie afrigtegnieke gehad het.

Ons was toe bereid om versigtig optimisties te wees oor die vooruitsig van ’n ou wat plat op die aarde klink, jeans en T-hemde dra, bitter min Engels kan praat en tog vertel hy verstaan die universele taal van sokker.

Hy kon nie die taal praat toe hy klubs in Saoedi-Arabië of Japan afgerig het nie en was baie gewild daar, het hy trots vertel. “Die Japannese gee nie drukkies en soentjies nie, maar die aanhangers het elke dag vir my blomme en lekkers gebring. Die spelers het my selfs Pa genoem.”

Joel is natuurlik rojaal vir sy werk vergoed – ’n koel R1,5 miljoen per maand – “30 keer meer”, het hy self gesê, as by sy vorige werk toe hy die Brasiliaanse klub Flamengo afgerig het.

Hy het streng dissipline in die span ingebring – hy was nie ’n man vir partytjies nie. “Ons wil nie engeltjies hê nie, maar ook nie boewe nie. Spelers het respek en verantwoordelikheid nodig. Ek probeer dinge eenvoudig en nederig doen.” Maar wat hy ook al probeer het, dit het net nie gewerk nie.

Lees oor Joel se grootste flaters in Huisgenoot van 29 Oktober.

Eksklusief: Theuns en Elizma maak ’n fliek

’n Skaap blêr oor die Karoo-vlaktes. “Nog ’n kee’, asseblief,’’ roep die gryskopman met die donkerbril in ’n swaar Engelse aksent. ’n Blondekopvrou klim nogmaals in ’n beige motortjie langs die teerpad en sy en ’n meisietjie met ’n rooi sonbril op die kop doen nogmaals hul ding.

“Perfect!” gil die grys ou en gee ’n sprongetjie in die lug, arms omhoog. Dis Darrell Roodt, die man agter die Oscar-benoemde fliek Yesterday, en die blondine is niemand anders nie as die sanger Elizma Theron.

Darrell-hulle is almal hier in die Noord-Kaapse dorpie Loxton om die bekroonde skrywer Deon Meyer se Afrikaanse fliek Jakhalsdans te skiet en Huisgenoot is eksklusief op die stel. Dis dag twee, en Lena Visagie, ’n Loxtoner, het kom inloer.

“Ek sien daar is Bart van 7de Laan ook,’’ sê sy en wys na Neil Sandilands, assistent-regisseur en ook ’n speler.

Darrell beduie iets aan ’n stoppelbaard-ou wat op ’n muurtjie sit in ’n langerige kakie-kortbroek en plakkies. Dis sowaar die rasperstem-sanger Theuns Jordaan.

Hy speel Ruan Landman, sy eerste akteursrol ooit en nogal die manlike hoofrol in ’n fliek.

Sjuut, maak Darrell almal stil, en Theuns trek weg – heel behendig vir ’n man wat nog nooit in ’n moewie was nie.

“Fantastic,’’ gil Darrell, verskriklik opgewonde.

Maar die nuwe ster voor die kameras bly sy ou beskeie self. “Jong, ons kyk maar,’’ sê hy.

Deon is natuurlik ’n wêreldbekende en bekroonde misdaadskrywer, maar dis ’n liefdesverhaal wat die rolprentspan hier na Loxton gebring het, een wat vier jaar gelede al in sy kop begin rondsweef het. Verlede jaar het hy toe begin skryf.

Hy’t ’n huisie op Loxton, vertel die skrywer, maar die naam van die fliek kom van die plaas hier buite die dorp waar hy op ’n keer met ’n veldmotorfiets-byeenkoms so lekker gekuier het.

“Die mense en die landskap is wonderlik en daarom het ek besluit om die fliek so te noem.’’

Lees meer oor Jakhalsdraai in Huisgenoot van 22 Oktober.

Eksklusief: Boer Flip is verloof!

Vir twee kandidaat-boervroue was sy kombuis te geel, sy badkamer te vaal, sy yskas te leeg en sy grappe sommer simpel . . .

Maar Wenda Uys (49) het geglo daar is niks wat ’n verfkwas nie kan reg toor nie – solank die man nommerpas is. En nou is sy en Flip Kotze (55) van die gewilde TV-reeks Boer Soek ’n Vrou verloof.

Anders as Ansebé Pieterse (44) en June Smith (57) wat ná net ’n paar uur op die plaas spore gemaak het, het Wenda nooit vir die kykNET-reeks ingeskryf nie. Sy en Flip het mekaar in George in ’n musiekwinkel ontmoet, presies ’n dag nadat die kameraspan hul eerste skote op sy plaas kom skiet het.

Flip het sy diamant herken toe hy haar sien en wou nie onder valse voorwendsels met die Boer-reeks voortgaan as Wenda nie ingesluit word nie.

Al ander boer wat ook tydens die pas afgelope werklikheidsreeks ware liefde gevind het, is Johann (30) van Standerton – maar nes Flip, is dit ’n meisie wat nie vir die reeks ingeskryf het nie.

Maar anders as Johann, was dit vir Flip belangrik om uit die staanspoor voor die kameras oop kaarte oor hom en Wenda te speel.

‘‘Soos met enige verhouding was ons nog besig om mekaar te leer ken. Dit het spontaan gebeur en waarom moes ek dit wegsteek? Ek wou ook vir June en Ansebé beter leer ken om perspektief te kry en die regte besluit te neem,’’ sê Flip, wat al 16 jaar geskei is en weet dat trou nie perdekoop is nie.

Wenda het nou as sekretaresse by ’n huis vir kwadrupleë in Riversdal bedank en by Flip ingetrek. En terwyl hy bedags op die lande is, werk sy om hul nessie op sy asemrowende plaas in die Langkloof mooi te maak.

Lees meer oor Flip en Wenda se lewe saam in Huisgenoot van 22 Oktober.

Eksklusief: Louis van Wyk huil oor Irene

Op die oggend van haar tragiese dood het die blondekop-sangeres haar pa gebel en vertel: “Ek gaan vandag vir iemand ’n geskenkie op ’n klein dorpie koop.”

Nou sal dit vir ewig ’n raaisel bly vir wie sy dié geskenk wou koop, en hoekom Irene van Wyk besluit het om die pad uit Pretoria te vat en die platteland in te vaar om die perfekte present te gaan soek.

“Sy vat die geheim saam met haar graf toe,” sê haar betraande eksman, die bekende musiekpromotor Louis van Wyk (53), minder as ’n dag nadat hy op 13 Oktober verneem het sy 44-jarige voormalige vrou is om halfvier die vorige middag op die Delmas-pad buite Bronkhorstspruit op slag dood in ’n motorongeluk.

Die polisie het ’n dag lank gesukkel om die gospelsangeres se geliefdes op te spoor. Hulle het die visitekaartjie van die aktrise Magda Beukes in die wrak gevind en haar gebel.

“Magda het my gistermiddag met die nuus gebel. Ek kon dit nie glo nie, ek het koue rillings gekry,” sê Louis verslae in sy huis in Fairy Glen, Pretoria.

Hy haal sy bril af en vee die trane weg. Die musiekman is nog getraumatiseerd nadat hy die vorige aand die liggaam van die ma van sy kinders moes gaan uitken. Hy probeer desperaat vergeet hoe verfrommel die wrak was waarna hy vroeër die oggend gaan kyk het.

Hy is veral bekommerd oor sy kinders, die twee wat al soveel dinge moes deurmaak sedert sy huwelik met Irene 11 jaar gelede op die rotse geloop het.

Irene-Louise (17), oftewel Rientjie, en Vaughn (20) het al baie swaargekry: Hul ouers is geskei toe hulle bloedjonk was, hul pa is ’n paar jaar gelede van seksuele teistering aangekla en hul ma was ’n alkoholis en depressielyer wat twee jaar gelede selfmoord probeer pleeg het deur ’n oordosis pille te drink.

Toe, nadat sy gerehabiliteer is, het sy verlede jaar ’n paar dae verdwyn en haar skielik weer na drank gewend.
Hoewel die kinders by hom woon, was hulle verknog aan hul ma, sê Louis. “Ek moet nou sterk wees vir hulle. Hulle het my nodig.”

Lees wat Louis oor Irene sê in Huisgenoot van 22 Oktober.

Alwyn wil in die Bok-span in hol

Die ys klingel toe Alwyn Hollenbach sy lemoensap na sy lippe lig en sweet drup van die glas af. Selfs in die skadu van die dekriet is die middaghitte versengend. “Ten minste hoef ons nie in dié oond te oefen nie,” sug hy dankbaar.

Maar op hierdie sonnige dag by sy huis in Ruimsig, Roodepoort, is die Leeus se kookwater-agterspeler meer as net dankbaar. Hy is trouens in die wolke. Met die vooruitsig dat hy heel moontlik vir die Springbokspan gekies sal word wat aan die einde van die jaar in Europa gaan toer én met ’n nuwe liefde in sy lewe, kan dit nie anders nie.

Hy glimlag soos net ’n verliefde man kan toe hy vertel: “Jean-Marie het die naweek hier gekuier en ek het vir haar ’n lekker Italiaanse aandete gekook. Ons het by die huis gebly en gelag en gesels.”

Die vrou wat die lang, gespierde rugbyspeler so besiel, is Jean-Marie Neethling (19), die Suid-Afrikaanse kampioenswemmer Ryk Neethling se jongste suster. Die afgelope maand gaan hy en hierdie Bloemfonteinse roos uit. “Ek het haar in Bloemfontein raakgeloop en ons het gaan koffie drink. Toe vra sy my om saam met haar na ’n liefdadigheidsgeleentheid te gaan,” vertel hy.

Sedert daardie aand draai Alwyn (24) se lewe om rugby en Jean-Marie. “Ek klim op ’n Dinsdag ná die rugby-oefening in my motor en ry net vir die dag Bloemfontein toe,’’ vertel hy. “Dan trek ek vieruur Donderdagoggend uit Bloemfontein weg om betyds vir die oefening terug in Johannesburg te wees.”

Sy oë trek op skrefies en hy glimlag weer. Die komplekse, interessante, aantreklike vrou wat hom so laat straal, trek in November nader. “Sy sal by Ryk se
akademie in Pretoria jong kinders onderrig en swem afrig,” sê hy.

En dan sal die liefde seker éérs blom . . .

Leer Alwyn beter ken in Huisgenoot van 22 Oktober.

Harry en Chelsy weer saam

Weke lank al bel en SMS hulle mekaar en het hulle die een geheime ontmoeting ná die ander. En hier’s die bewys, vasgevang op foto’s: Die derde aanspraakmaker op die Britse troon en sy sexy blonde meisie is weer bymekaar.

Nadat hulle die aand in ’n spoggerige kroeg in Londen omgekuier het, is prins Harry en Chelsy Davy die eerste keer weer saam afgeneem sedert hulle 10 maande gelede uitmekaar is. En mense in die binnekring sê die paar verkneukel hulle daarin om mekaar van nuuts af te leer ken en seker te maak dat dinge hierdie keer tussen hulle werk.

‘‘Hulle sal nie in die openbaar hande vashou nie en kruip weg vir die paparazzi, maar hulle is beslis weer bymekaar,’’ sê ’n vriend.

In die klub het hulle ure lank gesels en net oë gehad vir mekaar. ‘‘Dit het nie gelyk of hulle omgee om vir almal te wys hulle is weer saam nie,’’ sê ’n bron by die eksklusiewe nagklub Whisky Mist. ‘‘Hulle het almal dié aand aan die praat gehad. Hulle was nogal lank lekker knus saam in die BBP-area.’’

Die twee het aan Porn Star-martini’s en Dom Perignon-sjampanje geteug en tot middernag saam met Harry se niggies Beatrice en Eugenie gekuier. Dis ’n goeie teken, sê bronne. ‘‘Hy sou haar nie saamgeneem het om sy niggies te sien as hulle nie weer bymekaar was nie. Hy is in die wolke dat hulle weer saam is.’’

Die koninklike rooikop wat verlede maand 25 geword het, was verpletter toe die 24-jarige Chelsy hom aan die begin van vanjaar afgesê het – en dit nogal op Facebook (Soentjies, sonneskyn en sespakke, 5 Februarie). Dit was ’n ope geheim onder sy vriende dat hy wat sou gee om met sy eerste liefde herenig te word.

Lees wat Harry en Chelsy se vriende oor hul hereniging sê in Huisgenoot van 22 Oktober.

Mooie Michelle wys haar kleinding

Hallo, my seun,’’ sê Michelle Pienaar liefdevol terwyl sy oor die wit babawiegie buk. Sy skuif die wit-en-rooi muskietnet om die wiegie effens weg sodat sy haar bondeltjie vreugde beter kan sien.

Klein Joshua Peter Crosson se ooglede gaan effens oop en hy glimlag vir sy ma – net breed genoeg dat jy die kuiltjies in sy wange kan sien.

Michelle, wat ons as Audrey in Egoli leer ken het, blom in haar nuwe rol as ma vir haar drie maande oue seun. Toe sy hom uit die babawiegie haal en teen haar skouer laat rus, is hy dadelik so gemaklik dat sy donker ogies weer toeval.

‘‘Ek geniet dit vreeslik om ma te wees,’’ sê Michelle (29) en glimlag. Dit is duidelik Joshua het sy kuiltjies by haar geërf en sy trotse ma kan jou die dag en datum van sy eerste glimlaggie gee – dit was op 13 September.

‘‘Ek het dit dadelik in my dagboek neergeskryf. Dis iets wat ek altyd wil onthou.’’

En as Joshua sy ma se glimlag gekry het, het hy beslis pa Norval se voete: Sy tweede toon steek ook ’n entjie by sy groottoon verby. Maar sy persoonlikheid is ’n mengsel van hulle albei s’n, meen Michelle.

‘‘Hy is so rustig en soet soos sy pa deur die dag, maar kry laatmiddag woedebuie. Dan is hy soos ek – dramaties!’’

Of drama ook in Joshua se bloed is, sal hulle nog eers moet sien. En hoewel die hofsaak oor haar afdanking by Egoli nog hangende is (Trekpas gekry, want ek’s swanger, 16 April), sê sy sy sal glad nie omgee as Joshua ook sy brood as akteur wil verdien nie.

‘‘Solank hy gelukkig is, kan hy tot ’n hanswors word,’’ sê sy en fluister dan saggies vir die slapende kleinding: ‘‘Maar moet liewer nie ’n hanswors word nie. Ag wat, wees net gelukkig!’’

Wat meer kan ’n ma haar oogappel toewens?

Lees meer oor klein Joshua in Huisgenoot van 15 Oktober.

Boere het Elma baie van liefde geleer

Met haar blonde hare, innemende glimlag en sagte stem vol begrip lyk Elma Postma na menige man se droomvrou. En kykers kon nie help om te wonder of sommige van die boere in Boer Soek ’n Vrou nie heimlik gewens het sy was eerder ’n deelnemer aan dié gewilde werklikheidsreeks pleks van die aanbieder nie.

Sy sal haarself nooit aan ’n program soos Boer Soek ’n Vrou blootstel nie, sê sy reguit. ‘‘Kleintyd was ek baie skaam. Ek het agter my maatjies weggekruip in die konserte en om ’n aktrise te word, moes ek baie persoonlike grense verskuif. Iets soos ’n soeke na liefde is net te privaat.’’

Vra jy oor haar persoonlike lewe, klap die aktrise wat ons as Dezi in 7de Laan leer ken het, soos ’n oester toe.

‘‘Ek bewonder die boere. Dit kos baie guts om so oop te maak. Ek verkies dit om die vrae te vra,’’ sê Elma, wat ook voorheen aanbieder van Ontbytsake op kykNET was.

En nee, sê sy, daar steek geen waarheid in die gerugte oor ’n romanse tussen haar en Joachim Prinsloo van Kiepersol, ’n deelnemer aan die eerste Boer Soek ’n Vrou, nie.

Sy het wel baie oor die liefde geleer terwyl die twee seisoene van die gewilde kykNET-reeks geskiet is, gee sy toe.

‘‘Ek sien wat die manne doen en dan dink ek: ‘As ’n man in die toekoms so iets vir my sê, sal ek hom liewer nie glo nie’,’’ erken sy.

Soms het sy die boere darem jammer gekry omdat die kameras in moeilike situasies heeltyd op hulle gerig was. ‘‘Ek het jammer gevoel vir Ludwig toe Lily sê sy en Klarina wil hulle onttrek, want met die kameras op hom moes hy dit diplomaties hanteer en kon hy nie noodwendig sê wat hy wou nie.’’

Dit was ’n naelbyt-oomblik toe sy die twee meisies moes oorreed om op die plaas te bly.

Ook by Pieter H op sy wynplaas buite Franschhoek het sy hom bewonder dat hy neutraal gebly het toe sy vroulike gaste hom voor die kameras sleggesê en onder mekaar baklei het dat die hare waai. ‘‘Hy weet seker ’n stil bek is ’n heel bek,’’ laat sy hoor.

Lees meer oor Elma se Boer Soek ’n Vrou-ervaring asook die nuutste oor die boere Flip, Ludwig, Pieter H, Johann en Francois in Huisgenoot van 15 Oktober.

Skouspel 10 was ’n belewenis!

Dit was meer as ’n vertoning; dit was ’n belewenis toe Huisgenoot-Skouspel pas sy tiende verjaardag gevier het met onlangse treffers én lieflinge uit vanmelewe se dae, solo-optredes, duette en groepsang, snaakse én aangrypende oomblikke . . .

Vra maar enige van die mense wat die eerste van sewe vertonings in Sun City se Superbowl bygewoon het – Skouspel 10 het daardie ietsie ekstra gehad . . .

Selfs ses Chinese toeriste vir wie inderhaas kaartjies gereël is nadat Kurt Darren hulle by Sun City raakgeloop het, het ná die vertoning erken: So iets het hulle nog nooit beleef nie.

‘‘Ons verstaan nie die Afrikaanse woorde van die liedjies nie, maar ons kan sien hierdie is ’n baie spesiale geleentheid,’’ het een in gebroke Engels gesê.

Dit was inderdaad ’n emosionele oomblik toe hierdie musiekmakietie sy kinderskoene met ’n oorweldigende ontploffing van klank en kleur ontgroei het.

Byna 40 van ons land se mees geliefde musieksterre het 88 trefferliedjies gesing en 10 ikone van die musiekwêreld het vir die eerste keer saam opgetree toe hulle vir hul lewenslange bydrae tot Afrikaanse musiek vereer is. Ja, Min Shaw, Glenys Lynne, Carike Keuzenkamp, Rina Hugo, Nick Taylor, Ollie Viljoen, Jan de Wet, Manuel Escórcio, Lance James en Barbara Ray was almal daar, en toe hulle hul onvergeetlikste liedjies sing, moes die gehoor na hul sneesdoekies gryp.

Terwyl nuwe treffers en goue oues om die beurt opgeklink het, het jy besef: Skouspel is vanjaar ’n viering van ons ganse musiekgeskiedenis, en die byna 40 000 mense wat dit eindelik kon ervaar, was baie bevoorreg.

Lees meer oor die Skouspel van die dekade in Huisgenoot van 15 Oktober.

Agter die skerms by Skouspel

Hulle noem mekaar ‘‘liefie’’, hou heeltyd hande vas en koer soos tortelduiwe vir mekaar. Theuns Jordaan en Elizma Theron is so verlief hulle kan hul oë nie van mekaar afhou nie! Die sanger met die diep stem het onlangs verklap hy’s op soek na liefde (Kluisenaar in die kollig, 28 Mei) en dit blyk Kupido het nou sy wens bewaarheid. Maar die twee wil nie ’n woord rep oor hul verhouding nie en het selfs tydens Skouspel 10 by Sun City vir ons kameras probeer wegkruip. Dit was vergeefs, want ons kon nie die kans laat verbyglip om ’n kiekie van ons nuwe gunsteling-glanspaartjie te neem nie . . .

Dunay Nortjé moes Kurt Darren se persoonlike assistent vra om deur haar verloofde se dagboek te blaai en ’n naweek te soek wanneer hulle aanstaande jaar kan afhaak. Afgesien van drie Saterdae is Kurt elke naweekdag besig! ‘‘Gelukkig het hy twee Saterdae ná mekaar in Oktober oop; dis lank genoeg om te trou en op ons wittebrood te gaan,’’ sê sy.

Kry nog agter-die-skerms-nuus in Huisgenoot van 15 Oktober. Daar is ook hope pragfoto’s van die groot konsert.

Moe Shaik, baas van ons spioene

Daar het nou ’n ‘‘sonskyn-era’’ aangebreek vir die bondgenote van pres. Jacob Zuma wat saam met hom van korrupsie verdink is, het Moe Shaik ’n paar maande gelede vol selfvertroue verklaar.

En met die aankondiging dat hy die nuwe hoof van die Suid-Afrikaanse geheime diens is, baai Moe nou behoorlik in daardie sonskyn. Tog beskou baie mense sy aanstelling as ’n donker wolk wat oor die land hang en as ’n bewys dat die berugte Shaik-broers van Durban pres. Zuma steeds stewig in die sak het. Dit lyk trouens vir hulle of hulle nou ryklik vir hul jare lange hulp beloon word.

Jacob se onbetaamlike geldelike vennootskap met Moe se broer Schabir het hom in 2005 sy pos as adjunkpresident gekos. Baie mense beskou Moe, ’n voormalige spioen van die ANC, as die meesterbrein agter Jacob se politieke oorwinning verlede jaar oor Thabo Mbeki.

Dis juis omdat Jacob bang is dieselfde lot tref hom as vir Thabo dat hy sy ou vriend en getroue luitenant as hoof van die geheime diens aangestel het, meen baie.

Jacob moes ook uit ANC-geledere kritiek daaroor aanhoor, want mense soos die ANCJeugliga se Julius Malema meen daar is klaar genoeg Indiërs in senior poste in die regering.

Maar Jacob het voet by stuk gehou en volgehou Moe is die regte man vir die werk. Die Shaik-broers is immers die president se lojaalste bondgenote en raadgewers en kom al ’n baie lang pad saam met hom.

Die Shaik-broers het in ’n arm woonbuurt in Durban grootgeword waar hul pa ’n motorwerkwinkel gehad het.

Die vier seuns was almal uitskieters – Moe, die oudste, as geheime agent in beheer van die ANC se spioenasiebedrywighede in Natal; Schabir as sakeman en later geldwasser; Shamin (beter bekend as Chippy) as meganiese ingenieur en militêre kenner en Yunis as regsgeleerde.

Lees meer oor die Shaik-broers in Huisgenoot van 15 Oktober.

Gaan Emma vir Dawid pootjie?

Van die oomblik dat Dawid Greeff Hillside met sy ontwerperskoene binnegestap het, het die poppe begin dans. Niemand was bestand teen sy vleitaal en soet woordjies nie.

Die vroue in 7de Laan het die een ná die ander voor sy sjarme geswig. Maar nou lyk dit asof hy ’n bietjie van sy eie medisyne gaan terugkry – of gaan hy dalk tog nog ’n hart wen net om dit later te vertrap?

Kykers het onlangs gesien hoe Emma Lategan sy jongste slagoffer word. Dié rooikop loop mos altyd met drome in haar oë rond oor die regte een . . . Hoe kon sy hom weerstaan toe hy alles in die stryd werp om haar hart te wen?

Dis dié dat sy die arme Herman soos ’n warm patat gelos het om liefde in Dawid se arms te vind. ‘‘Sy glo regtig Dawid is die liefde van haar lewe,’’ sê Bertha le Roux, wat Emma in die gewilde sepie op SABC2 speel.

Min weet haar karakter dis alles deel van ’n wraakplan wat Gita McGregor, die feeks in die Laan, gesmee het. Sy blameer Emma omdat haar en Tim se affair op die lappe gekom het, want Emma het dié brokkie nuus met Linda gedeel. Toe koop Gita vir Dawid met haar tjekboek om om Emma se hart te verower.

Maar die liefde het ’n manier om soos ’n wilde perd sy eie koers in te slaan en dit wil-wil nou lyk asof Dawid regtig gevoelens vir haar begin koester – maar kan hy opreg vir enige vrou omgee? Gaan hy haar aanhou om die bos lei of met die hele sak patats vorendag kom? Of gaan dié twee dalk tog op die ou end saam geluk vind?

Al wat Bertha verklap, is dat Emma en Dawid se verhouding stormagtig gaan wees, want hy is vreeslik jaloers . . .

Lees verder oor onder meer Bertha se liefdesteleurstellings in Huisgenoot van 8 Oktober.

Sanger Gerhard maak sy hart oop

In die 10 jaar sedert sy pa oorlede is, het Gerhard Steyn en sy ma nog nooit daaroor gepraat nie. Om die waarheid te sê, die aantreklike sanger het sy ma nog nooit eens gevra hoe sy pa dood is nie.

Hy kan nie en hy wíl nie. Want die herinneringe aan sy pa – en die gedagte aan sy dood – maak séér.

Dis ’n man dié wat weet hoe kompleks en broos die lewe is. Sy derde CD, die een wat pas platinumstatus behaal het, noem hy nie om dowe neute Breekbaar nie. Hoewel die hartebreker breë skouers en ’n parmantige houding het, is hy nie skaam om sy eie weerloosheid te wys nie.

En hy maak musiek om net een rede: Hy wil mense wat soos hy seergekry het, help om gesond te word.

‘‘Mense wil nie hartseerverhale lees nie; hulle wil eerder wenverhale lees. Hulle wil weet hulle kan hul eie hartseer oorleef,’’ sê die sanger wat al boekrakke vol motiveringsboeke gelees het om hom te herinner jy bepaal jou eie sukses.

Hy’s self die toonbeeld van iemand wat besluit het: Ek sál my drome bereik, selfs al lyk dit heeltemal onmoontlik.

Kyk maar na die feite: Hy’t brandarm grootgeword, maar hy besit deesdae ’n duur Jeep, ’n spogmotorfiets, ’n resiesboot en ’n stylvolle huis buite Pretoria. Hy was skaam en inkennig op skool, maar hy sing sy treffers Baby Tjoklits en Pennies en Ponde deesdae voor gehore van duisende jillende vroue wat hom almal wil hê.

Hy glo vandag hy kan dalk eendag die voorste Afrikaanse sanger in die land wees, selfs al moes hy op ’n kol as uitsmyter en toe as ’n verkoopsman by ’n sonbrilwinkel werk om die pot aan die kook te hou.

Want Gerhard (32) is iemand wat oor en oor bewys: Enigiets ís moontlik.

Leer Gerhard verder ken in Huisgenoot van 8 Oktober.

Suid-Afrika ‘hét baie talent’

Sy sitvlak het al op die verhoog vlam gevat en ’n mede-akteur het in een toneel so meegevoer geraak dat hy hom per ongeluk met ’n mes gesteek het. Rob van Vuuren sit nou nog met die letsel.

Maar dis hoeka dinge soos dié wat hom so lief maak vir sy werk, skerts die komediant-akteur wat nou weer op TV te sien is as aanbieder van die splinternuwe talentprogram SA’s Got Talent saam met die borrelende 5fm-aanbieder Anele Mdoda.

Dié talentsoekreeks is Suid-Afrika se weergawe van die werklikheidsreeks Britain’s Got Talent wat die vaal Susan Boyle van

Skotland oornag in ’n internasionale ster verander het. En hier kan ons ook regskuif vir hope aksie, want niemand anders nie as Idols se bitterbek, Randall Abrahams, is ’n beoordelaar saam met Strictly Come Dancing se Ian von Memerty en die radiopersoonlikheid Shado Twala.

En Suid-Afrika hét hope talent, sê Rob (33), ’n man wat self met The Most Amazing Show naam gemaak het en verlede jaar in Strictly Come Dancing sy slag as bobaas-danser gewys het.

Eers het Rapid Blue Productions, die vervaardiger van SA’s Got Talent en ’n maatskappy met wie Rob al voorheen gewerk het, hom gevra om ’n oudisie af te lê en toe hy weer sien, was die joppie syne, vertel die man oor dié groot pluimpie. “Hulle is ’n fantastiese span mense en ons werk so lekker saam.’’

Hy is ewe dol oor sy mede-aanbieder Anele se borrelende persoonlikheid. “Ons het mekaar al tydens Strictly Come Dancing ontmoet en sy is die ene pret. Ons het dadelik gekliek; daar is net daai natuurlike woema tussen ons.’’

Die reeks is ’n bewys van al die verskillende kulture en talente in ons land, sê hy. “Ons het saam gelag en gehuil. Ons was geskok maar ook aangenaam verras toe mense stories oor hul lewensreise vertel het. Dié reeks maak my ongelooflik trots op ons land en sy mense.’’ En vir ’n slag is dié grapjas doodernstig.

Lees meer oor Rob in Huisgenoot van 8 Oktober.

Leiersvrou wat soggens die son eet

Sy kan die moonwalk doen, het vir Tom Cruise in ’n vorige lewe geken, eet in die oggend die son vir energie en is 20 jaar gelede deur ruimtewesens ontvoer . . .

Een ding is seker: Die nuwe premiersvrou van Japan, Mijoeki Hatojama, is beslis geen muurblommetjie nie.

En die 66-jarige voormalige aktrise het die indruk van Japannese vroue as stemmig en onderdanig heeltemal op sy kop gekeer.

Tydens die land se verkiesingsveldtog het sy heel gangbare moonwalk-passies uitgevoer terwyl omstanders haar manewales op hul selfone vasgelê het.

Die land se premiersvroue was nog altyd op die agtergrond en het kinders grootgemaak, maar dié een is anders. Terwyl haar man, Joekio Hatojama (62), die land regeer, gaan Mijoeki beslis nie die rol van die besadigde premiersvroutjie speel nie.

Trouens, haar kop staan Hollywood toe. En moenie waag om dit as ’n onmoontlike droom af te maak nie.

‘‘Drome wat onverwesenlik is? Ek dink nie ek het so iets nie,’’ het sy in ’n onderhoud gesê. ‘‘Drome sal waar word as jy vas genoeg daarin glo.’’

Toe voeg sy by: ‘‘Die droom wat ek nou wil bewaarheid en glo waar sal word, is om rolprente te maak.’’

In nog ’n onderhoud het sy verklap sy het Tom Cruise in ’n vorige lewe geken. Hy was toe glo ’n Japannees. En nou wil sy opsluit ’n Hollywood-fliek saam met hom maak.

‘‘Tom Cruise sal die manlike hoofrol vertolk, want ek weet hy was ’n Japannees in ’n vorige lewe. Ek onthou ek en hy was toe saam. Ek glo hy sal verstaan as ek vir hom sou sê: ‘Ek het jou lanklaas gesien’ wanneer ons mekaar ontmoet.’’

Mijoeki wou nie meer inligting oor die storie verklap nie, maar het gesê die fliek gaan ‘‘mense se sin vir waarde drasties verander . . . ek gaan beslis ’n Oscar daarvoor kry’’.

Wonder of Tom ’n sê in die saak het?

Lees meer oor Mijoeki se eienaardighede in Huisgenoot van 8 Oktober.

Het Jen oplaas ware liefde gevind?

Wanneer sy die dag nes ’n stout skoolmeisie lyk, kan jy maar weet dis weer sulke tyd . . . Jennifer Aniston is verlief. Want kyk net hoe stralend en hoeveel gesonder lyk sy. Sy loop oor van selfvertroue, daar is ’n duidelike wip in haar stap en wanneer sy glimlag, glinster haar oë parmantig.

Maar wie is die nuwe man in haar lewe? Die skindertonge op die stel van haar jongste rolprent, The Bounty, klap oor daardie vonk tussen haar en haar sexy Skotse medester, Gerard Butler. En dis nie net goeie toneelspel nie, sê dié wat weet. Binne ’n paar weke het die ligte flirtasie tussen hulle in iets baie ernstigers ontwikkel.

’n Agie het gesien hoe hy by haar woonwa insluip. En eenmaal het stelwerkers die twee, wat die Amerikaanse skinderkoerante al klaar JenGer gedoop het, sien hande vashou. Maar hulle het mekaar se hande vinnig gelos toe hulle agterkom mense hou hulle dop.

‘‘Die verhouding is oulik,’’ sê ’n bron op die stel. ‘‘Dit lyk of hulle in die beginfase van iets baie moois is.’’

Sedert die rolprent klaar geskiet is, kontak hulle mekaar byna daagliks en was hulle al op verskeie afsprake saam uit, die laaste keer saam met vriende. Maar dit het gelyk asof hulle niemand anders raaksien nie.

‘‘Hulle het mekaar gesoen, omhels en langer as twee uur vorentoe geleun om met mekaar te gesels. Hulle het beslis soos ’n paartjie gelyk,’’ vertel iemand wat daar was.

Maar moenie dink Jen gaan bevestig daar is ’n romanse tussen haar en die silwerdoek-prikkelprins aan die broei nie – hy is die bekendste vir sy rol as koning Leonidas in die geskiedkundige aksierolprent 300. Toe ’n dapper verslaggewer haar oor die verhouding uitvra, het sy dié toegesnou: ‘‘Of ek met iemand uitgaan of nie, het niks met iemand anders uit te waai nie.’’

Tog kon sy nie die versoeking weerstaan om iets te verklap nie: ‘‘Ek sal wel sê Gerry Butler is ’n wonderlike mens. Hy is fantasties, en ja, betowerend is ’n woord wat ek ook daarby sal voeg. Maar die res is my saak. Daar’s mos niks verkeerd daarmee om mense aan die raai te hou nie, of hoe?’’

Gerry? Sy noem hom Gerry. Ha! Dit sê baie.

Lees meer oor die nuwe man in Jen se lewe in Huisgenoot van 8 Oktober.