Mej. SA opgetof vir Mej. Heelal

Oor enkele weke word die nuwe Mej. Heelal gekies, en vir dié wat al begin wonder het wat ons eie Tatum Keshwar gaan dra wanneer sy kragte meet teen die wêreld se mooistes – vandag is jul gelukkige dag!

Ons gee julle vandag ’n eksklusiewe kykie na twee van haar belangrikste uitrustings: die nasionale kostuum en die rok wat sy vir die laaste ronde van die beoordeling sal aantrek.

Dit was Reginald Molamu en Paledi Segapo van RjKay Creations se taak om die langbeen-skoonheid se nasionale kostuum te skep. Hulle het ’n hedendaagse Zoeloe-bruidsuitrusting as tema gekies.

‘‘Dis ’n gesofistikeerde, elegante en moderne weergawe van die tradisionele bruidsrok,’’ sê Reginald van die pragtige rok van R25 000. “Tatum kom van KwaZulu-Natal, dus pas die Zoeloe-tema haar perfek.’’

Die romp bestaan uit meer as 90 stroke kunsleer wat met die hand aan lae middernagblou tulle vasgewerk is en aan die onderkant met kralewerk afgerond is. Die fokuspunt is die diervelmotief-korset met ’n mantel van sy-chiffon. Vir bykomstighede het die span van RjKay landelike Zoeloe-vroue gevra om vir haar juwele, ’n isicholo (trouhoed) en ’n bruidstok van krale te maak.

Die Zoeloe-bruid-konsep was deels haar idee, sê Tatum. ‘‘Ons wou iets kreatiefs en oorspronkliks hê, maar omdat dit ’n kostuum is, moes dit ook spoggerig en teatraal wees. Boonop is die Zoeloe-kultuur internasionaal herkenbaar as Suid-Afrikaans.
As ek dit in een woord moes beskryf, sou ek sê dis koninklik.’’

Lees meer oor Tatum se uitrustings en haar wen-kanse in Huisgenoot van 16 Julie.

Harry Potter en die hormone

Hier kom hy – nog ’n l . . . Of wag, laat ons liewer nie daardie woord gebruik nie, dit maak Daniel Radcliffe net kwaad.

Natuurlik gaan die fliek een van hulle wees, met sy asemrowende spesiale effekte, ’n skitterende rolverdeling en ’n mega-miljoendollar-begroting en al die verwagtinge oor die koms van Harry Potter and the Half-Blood Prince, die sesde aflewering in die gewilde towenaarreeks.

Maar jy moet tog net nie die woord lokettreffer voor die hoofspeler noem nie . . .

“Ek haat dit,” sê die 19-jarige akteur en sidder asof Lord Voldemort besig is om hom met die Cruciatus-vloek te martel. “Dis aaklig, want dit klink soos net nog ’n aksiefliek of die een of ander rolprent wat die skare tevrede wil stel.”

Natuurlik is Half-Blood Prince veel meer as dit. Die projek van $200 miljoen (R1,6 biljoen) wat al in 2007 aangepak is, was ’n reuse liefdestaak – van die bou van die enorme stelle tot die verfyning van die draaiboek en die produksie self, wat sommige dae vereis het dat ’n span van tot 2 000 mense daaraan werk.

Geen wonder Potter-betotteldes kon nie meer wag nie. Die fliek moes al verlede jaar uitgereik gewees het, maar Warner Bros Pictures het op die nippertjie besluit om dit tot 15 Julie vanjaar uit te stel. Aangesien die Batman-fliek The Dark Knight so ’n groot treffer was, was die rolprentbase glo bekommerd dat die gehore nie vir nog ’n lokettreffer (jammer, Daniel) sou kans sien nie.

Maar te oordeel na die vroeë publisiteitsfoto’s was hul vrese heeltemal ongegrond . . .

Die rolprent open dramaties wanneer Voldemort se Death Eaters Londen aanval en die bekende Millennium-brug in die Teemsrivier laat stort. En toe Harry bewyse uitsnuffel dat sy aartsvyand Draco Malfoy kop in een mus is met die Dark Lord, word dit duidelik dat selfs Hogwarts ook nie meer ’n veilige hawe is nie.

Aanhangers wat die boeke gelees het, sal ook weet die studente stry deesdae teen ’n heel nuwe aanslag wanneer die tienerhormone by die towenaarskool amok maak.

Dit raak alles vreeslik ingewikkeld.

Lees meer oor Harry en sy en sy vriende se stryd teen die hormone in Huisgenoot van 9 Julie.

Martina Navratilova en haar eks stry oor geld

Hul sprokiesromanse het begin met ’n soen voor die 7-Eleven, maar byna ’n dekade later is daar g’n sprake van die liefde wat hulle voor die kansel laat beland het nie.

Die tennislegende Martina Navratilova (52) se eks sleep haar nou hof toe vir ’n deel van die geld en bates wat sy opgebou het toe die twee nog saam was. Toni Layton (56) beweer sy’s “op straat uitgeskop met net die klere aan haar lyf”.

Ná hul troue in 2000 het hulle aan mekaar ’n mondelingse belofte gemaak om alles gelykop te verdeel as hulle ooit sou skei, hou sy vol.

En daardie “alles’’ is heelwat – ses huise van miljoene dollars, ’n Mercedes-Benz, twee Land Rovers, ’n Jeep, ’n snelboot, twee waterponies, twee bromponies en twee veldvoertuie. Martina het haar geskenke teruggevat en weier om dit terug te gee, kla Toni. Daaronder is juweliersware, ’n fiets, keramiekpotte en drie vuurwapens – twee haelgewere en ’n pistool – wat in dié stadium dalk Toni se snellervinger laat jeuk . . .

In Januarie verlede jaar het sake tussen die twee skeefgeloop en nou soek Toni haar deel van die aardse skatte en daarby skadevergoeding van $500 000 (sowat R3,9 miljoen) vir die “emosionele, geestelike en fisieke trauma” wat sy moes deurmaak.

“Ek het vir my prokureur gesê ek wil $350 000 (sowat R2,7 miljoen) vir ’n huis en nog $150 000 (R1,2 miljoen) hê om weer oor te begin,” sê Toni, wat nou tydelik by ’n vriend in New York bly. “Voor sy my uitgeskop het, het sy my kredietkaarte gekanselleer en my naam van ons gesamentlike rekeninge verwyder.”

Hoewel hul troue nie wetlik erken word nie, hou Toni vol sy is geregtig op ’n deel van Martina se bates. En as sy die waarheid vertel oor hoe Martina met haar uitgemaak het, kan jy nie anders as om ’n bietjie simpatie met haar te hê nie.

Lees meer oor Toni se dilemma in Huisgenoot van 9 Julie.

Stem vir jou gunsteling- Afrikaanse sangers en wen!

Laat Afrikaanse musiek jou hart warm klop? Kom kuier dan saam met Huisgenoot en geniet ’n jolige aand saam met ons topkunstenaars in die Afrikaanse musiekbedryf. Dis Tempo-tyd, maar met ’n heerlike nuwe kinkel. Vanjaar staan dié toekenningsaand op sy eie bene, want Huisgenoot-Skouspel se jong boet het sedert sy ontstaan vier jaar gelede in ’n spiertier ontwikkel. En dit sonder steroïede, alles net met musiekkrag . . .

Ja-nee, die Tempo-toekennings is ons trots, des te meer omdat dit julle, ons Huisgenoot-lesers, is wat met jul stemme wys watter Afrikaanse talent jul bloed die vinnigste laat bruis. En dalk is jou stem vir vanjaar se wenners die een wat vir jou een van ons 10 dubbelkaartjies na vanjaar se Tempo-toekennings besorg!

Jy kan op drie verskillende maniere stem vir jou gunsteling Afrikaanse musieksterre stem.

SMS: SMS die sleutelwoord van die kategorie en die nommer van jou gunsteling, gevolg deur jou naam en van, na 32113. As jy byvoorbeeld vir Staaldraad as die gewildste rock-album wil stem, SMS jy ‘‘T ROCK 4” en jou naam en van.
Jy kan soveel keer stem as wat jy wil, maar jy mag net een stem per kategorie per SMS stuur. Moet dus nie vir al jou gunstelinge in een SMS stem nie, want dit sal jou stem diskwalifiseer. Elke SMS kos R1. Die stemlyn sluit op Maandag 27 Julie om 17:00.

AANLYN: Jy kan ook aanlyn by www.huisgenoottempo.com vir jou gunstelinge stem. Jy kan soveel keer stem as wat jy wil.
MXIT: As jy nog nie MXit op jou selfoon het nie, kan jy dit maklik aktiveer. Maak seker jou selfoon se GPRS-funksie
is geaktiveer. Indien nie, kontak jou diensverskaffer om die aktiveringskode na jou selfoon te stuur. Bêre dit op jou selfoon en laai dan MXit deur met jou selfoon na www.mxit.co.za/wap te gaan. Gaan dan na Tradepost (wat nou op jou skerm verskyn) en stuur ’n leë boodskap. Maak MXit Mix in Trade-post oop. Kies HUISGENOOT en teken in. Huisgenoot is nou een van jou MXit-kontakte en jy kan begin stem vir jou gunsteling-kunstenaars en -albums.
Elke stem kos R1.

Lees Huisgenoot van 9 Julie vir meer inligting oor die kategorieë en vir wie jy almal kan stem.

Kaptein Graeme Smith skryf ’n boek

Graeme Smith, die Suid-Afrikaanse krieketspeler van die jaar, se linkerarm is nog styf verbind ná ’n onlangse operasie, maar dit het dié linkshandige held nie gekeer om handtekeninge uit te deel by SA Krieket se jaarlikse toekenningsaand by die Sandton-konvensiesentrum nie. Hy het in Januarie die verbeelding aangegryp toe hy in Sydney met ’n gebreekte hand vir die Proteas op die veld gestap het. Hy vertel meer van dié dag in sy boek, A Captain’s Diary, wat laat in Julie verskyn.
Makhaya Ntini het niks gewen nie, maar was soos gewoonlik heelaand op sy stukke.
Hul Protea-spanmaat Albie Morkel en vroulief Marthmari verwag hul eersteling in Desember. “Dis eintlik ’n lekker Kersgeskenk,” het Marthmari opgewonde vertel. Albie was vreeslik bly om te hoor dis ’n seuntjie en hulle hoop die kleinding volg in Pa se voetspore. – Sulaiman Philip.

DIE WENNERS
Die Suid-Afrikaanse Krieketspeler van die Jaar: Graeme Smith
Die Spelers se Speler: JP Duminy
Die Castle-toetsspeler: Graeme Smith
Die Aanhangers se Speler: AB de Villiers
Die KFC-Aksie-uitblinker: JP Duminy
Die Pro 20-Speler: JP Duminy
Die Eendagspeler: AB de Villiers
Die Groentjie van die Jaar: Roelof van der Merwe

Lees meer oor bekendes in Huisgenoot van 9 Julie.

Colin Moss, die internasionale rolprentster

Die Number 10-akteur Colin Moss vertel sedert hy in dié rugbyfliek gespeel het, bly hy fiks deur Thaise skopboks, Muay Thai, te beoefen. “Die oomblik dat ’n akteur laat slap lê, kom daar iets op sy pad wat vereis dat hy weer fiks word,” sê hy. Die nuwe aksiefliek waaraan hy pas in Durban gewerk het, is ’n goeie voorbeeld hiervan. Surviving Evil gaan oor die kameraspan van ’n oorlewingsprogram wat op ’n Filippynse eiland gestrand raak. Colin en sy mede-akteurs, onder wie die Amerikaner Billy Zane en die Brit Natalie Mendoza MENDOZA, moes gereeld deur die wildernis hardloop terwyl ongediertes uit die plaaslike storieskat hulle kastig jaag. – ALET VAN ZYL

Lees in Huisgenoot van 9 Julie ook meer oor David Fourie se video vir sy liedjie Grotman, Michelle Pienaar se nuwe baba en Jason Hartman wat komberse vir behoeftiges help insamel.

’n BOK VIR WEN

Vannag sal Morné Steyn heerlik droomloos slaap. Want waaroor droom ’n mens immers as ál jou drome klaar verwesenlik is?

Die nuwe Springbok is net ’n bietjie moeg. Hy het heeldag geoefen vir die tweede toets teen die Leeus. “Is dit nie elke seuntjie se droom om vir die Springbokke te speel nie? Ek weet dit was altyd myne. Maar Victor Matfield herinner my tog nou daaraan dat dit eintlik net die begin is.”

Nie dat Morné nie reeds ’n droomseisoen agter die rug het nie. Hy en sy spanmaats by die Bulls is hierdie seisoen se Super14-kampioene, en sonder aarseling gaan hy voort: “Vir enige speler sou dit die hoogtepunt van hul seisoen gewees het om die Super14 te wen. En om vanjaar voor die skare by Loftus te kon speel, het die oorwinning ekstra spesiaal gemaak. Dit sal altyd ’n hoogtepunt wees wanneer ek na my loopbaan terugkyk. Maar om ’n Bok te word, is nóg groter.”

Hy het sy eerste toets in die Groen-en-Goud agter die rug en sy lewenslange droom is verwesenlik. En nou het hy net een doel voor oë, en dit is dat die Bokke die reeks wen. “Dis vir my veral baie spesiaal om nou gekies te word terwyl ons teen die Britse en Ierse Leeus speel, want daar is spelers wat nooit die kans gekry het nie. Nou moet ons wen.”

Die uitdeel van die truie aan die manne wat die dag op die veld gaan draf, was nog altyd ’n gewigtige Springbok-tradisie. Gewoonlik is dit die voorreg van ’n voormalige speler wat dan vertel hoe trots hy gevoel het toe hy die trui gedra het en watter opofferinge jy daarvoor moet maak. Maar dié keer het die sakeman Johann Rupert, grootbaas van Remgro, die truie uitgedeel.

“Ál my besittings kan steeds nie vir my een van dié besorg nie en julle moet trots wees op wat julle bereik het,’’ het Johann gesê voor hy die gesogte truie uitgedeel het.

Lees hoe dit voel om ’n Springbok te wees in Huisgenoot van 2 Julie.